أحداثمقالاتيوم اللاعبين 2013

يوم اللاعبين 2013: وش سوّينا فيه، ووش رأينا عنه!

sgbooth

وانتهى يوم اللاعبين 2013، الحدث السنوي اللي صار شي متعارف عليه بين اللاعبين. انتهى بعد الكثير والكثير من الجهود المشتركة بين أطراف مترامية في كل مكان.

الكثير كان يسالني وأسأله عن المعرض: عن التنظيم، الألعاب الموجودة، المكان، المسرح، البلاي ستيشن 4 وغيره الكثير. اليوم جمعنا لكم كامل آراءنا عن المعرض من ايجابيات وسلبيات.

أول شي نبي نقوله، وهو حدث كبير بالنسبة لنا. للمرة الأولى في تاريخ الموقع، سوينا حلقة بودكاست مباشرة مع الحاضرين! كانت تجربة استثنائية لنا، وكنا مبسوطين جداً بالتفاعل اللي شفناه مع الجمهور. الحلقة كانت عن سوالف عامة مع الجمهور، هم يسألوني وحنا نجاوب، فيها فقرات أسئلة بسيطة سألناها الجمهور ووزعنا جوائز عليها. تقدر تقول انها فقرة “ما يطلبه اللاعبون” لكن لمدة ساعة ونص.

audience

غير كذا، كان عندنا الجناح حقنا اللي سويناه! ردة الفعل كانت فوق المتوقعة الحمدلله، قدرنا نحط مكان واضح لجمهورنا يجتمعون فيه ونسولف معهم. ثلاث أيام من العمل المتواصل والنتيجة كانت رائعة، كلها بفضل الله ثم بفضلكم يارهيبين!

هذا بالنسبة للي سويناه، أما بالنسبة لآراءنا عن المعرض بشكل عام، فهذي الايجابيات والسلبيات بالاضافة الى أشياء نبي نشوفها في يوم اللاعبين 2014 ان شاء الله.

الايجابيات:

  • التنظيم! أكثر كلمة سمعتها في المعرض. التنظيم هو أكثر شي تميّز فيه المعرض.
  • مساحة المعرض ممتازة جداً وكان بامكانها استيعاب جميع الحاضرين، ما كانوا يحسّون بالزحمة.
  • وجود مطعم وكافيهات وأماكن للجلوس والاستراحة، عكس المعارض اللي قبل ما كان فيها الا كشك يبيعك سندويتشات.
  • تعاون المنظمين والمسؤولين بشكل ملحوظ. خلال أيام المعرض، كل يوم يمر من عندنا مسؤول من سوني ويسألنا عن كل صغيرة وكبيرة.
  • توزيع محتويات مجانية كثيرة مثل فنايل KillZone وميدالياتها.
  • المرونة في صفوف الانتظار. كثير من الصفوف كانت تمشي بشكل سريع.
  • مراعاة ذوي الاحتياجات الخاصة واعطاءهم أولوّية.

السلبيات:

  • قلّة المحتوى، خصوصاً البلاي ستيشن 4. الكثير اشتكى من عدم وجود ألعاب كافية للبلاي ستيشن 4.
  • عدم توقّع توجّه الناس بشكل صحيح من ناحية منصّات الألعاب. منصّة Assassin’s Creed IV صغيرة ولكن الطلب عليها كان كبير، العكس تماماً مع Beyond: Two Souls.
  • موقع المصلّى غير واضح. كثير من الحاضرين ما عرف وين موقعه وقرّر يختار زاوية من المعرض ويصلّي فيها.
  • على ان بعض الصفوف كانت تمشي بشكل سريع، الا ان قليل منها كان يمشي بشكل بطيء وخلّا البعض يشتكي من هذا الشي.
  • كثرة المساحات الغير مستغلّة في المعرض. كثير من أماكن المعرض كان ممكن استخدامها بوضع ألعاب بدل ما تكون مساحة فاضية.

وش نبي نشوف في يوم اللاعبين 2014؟

  • اهتمام أكبر ببيع أشياء متعلقة بالألعاب مثل الفنايل والستيكرات والميداليات وغيرها. أقدر أضمن ان أكثر من 50 شخص كان يسألني عن ميداليات كيلزون.
  • محتوى أكبر، خصوصاً الألعاب المطلوبة والجديدة أو ديموز لألعاب ما نزلت.
  • دخول Microsoft في المعرض بحيث يتوفّر للاعبين ألعاب أكثر وأجهزة أكثر، وبالتالي محتوى أفضل.

تعليق أخير

استمتعنا كثير بيوم اللاعبين، واستمتعنا أكثر بحضوركم وتفاعلكم معنا في حلقتنا المباشرة وبشوفتكم في الجناح حقنا! تفاجأنا كثير بالعدد اللي جا وسلّم علينا وأعطانا من وقته يسولف معنا. نعتذر من القلب للناس اللي ما قدرنا نسولف معهم أكثر وأكثر، واللي اضطرينا نقطع السوالف معهم بسبب الزحمة اللي كانت عندنا، لو الأمر بيدّنا كان جبنا فرشات وفرشناها وجبنا شاهي قهوة وقلبناها جلسة سوالف، لكن للأسف الأمر ماهو بيدنا.

فيه برضو ناس ساهموا في تذكيرنا بالايجابيات والسلبيات، وهم مجتمعنا على جوجل بلس. استفدت منهم كثير في كتابة هذي المقالة.

حسب ما شفت وسمعت، الكثير يقول ان هذا أفضل معرض للآن. وش كان رأيكم انتو في المعرض؟ ووش رأيكم في الجناح اللي سويناه والحلقة المباشرة حقتنا؟ شاركونا برأيكم في التعليقات!

الوسوم
اظهر المزيد

محمد الشريف

كاتب ومدير تحرير موقع سعودي جيمر. أعشق ألعاب الفيديو من يومي صغير (ايه كلنا كذا)، أحب ألعاب التخفّي والرعب، وأعشق سلسلة Metal Gear ولعبة Silent Hill وICO.
إغلاق