مشغول وما عندك وقت تلعب؟ هذي سبع نصايح ممكن تفيدك

إذا كنت جيمر حياته زحمة، ومنت لاقي وقت تلعب فيه زي زمان، وحاس أنك مقصر تجاه هوايتك بسبب التزاماتك أو ارتباطاتك الثانية، أو صارت مجموعة العابك اللي لسه ما لحقت تلعبها كبيرة لدرجة أنك منت عارف من وين تبدأ أو كيف تخلصها. جمعت لك من تجربتي وتجارب غيري نصائح وطرق تساعدك أنك ترتب ممارستك لهوايتك الجيمرية، وتستغل وقتك اللي تقضيه فيها بأحسن شكل، ولخصتها لك في 7 نصائح هي:

1. نظم وقتك وأولوياتك وأعطيها حقها

إدارة الوقت من اهم المهارات اللي لازم تكتسبها وتركز عليها لأنها تعتبر من مفاتيح الحياة الناجحة بشكل عام، والإنسان اللي ما يقدر يتحكم في وقته ويديره بطريقة صحيحة ويرتب أولوياته، ما حيقدر يستغل وقته الاستغلال الصحيح، ولا حيقدر يستمتع بوقت فراغه زي ما يحب. كل إنسان فينا عنده أولويات والتزامات تختلف عن غيره، لكن ممكن نجمعها عموما في “دينك/صلاتك، أهلك وقرايبك، دراستك أو شغلك، أصحابك وعلاقاتك الاجتماعية المختلفة، وحتى نومك!” إذا قدرت تعطي كل هذي الالتزامات والأولويات حقها من وقتك، حتقدر تستمتع بوقت فراغك من دون إزعاج وبالتالي تلعب ألعابك أكثر وأحسن بمراحل من الإنسان اللي كل ما يجي يلعب يقطع وقت فراغه ولعبه التزام أو أولوية من اللي تونا ذكرناهم. اقترح عليك اختيار أوقاتك المفضلة والأيام اللي تكون الأنسب إنك تلعب فيها من كل أسبوع، وخلي اللي حولك يعرفوها عشان يبنوا التزاماتك معاهم عليها. واتذكر إنك كل ما حسست اللي حولك إنك تحترم وقتك معهم حيحترموا أوقات فراغك ولعبك. وإذا أنت تلعب يوميا، حاول تختار نوع لعبتك على حسب وقت اليوم. يعني مثلا لو حاب تلعب كم مباراة كورة أو كم شوط في Multiplayer Shooter أو أي لعبة نظامها متقطع، اختار الوقت اللي بين صلوات العصر والمغرب أو بين صلوات المغرب والعشاء، وبعدها اعطي باقي وقتك لالتزاماتك الثانية. أما لو حاب تلعب لعبة نظامها متواصل وتاخذ وقت، خليها بعد صلاة العشاء أو بعد ما تخلص التزاماتك أو مشاويرك ومخمخ عليها إلى ما يجي وقت النوم.

2. حدد استهلاكك للألعاب والتزم فيه

كثير مننا يحب يجرب أنواع الألعاب المختلفة، وكلنا عندنا أنواع العاب مفضلة عن غيرها نحبها وكنا نقضي فيها وقت كبير. لكن مع مرور الزمن نلاقي انه صار عندنا وقت اقل نقدر نعطيه للتجربة أو للعب العابنا المفضلة. أفضل الطرق إنك تحدد الألعاب اللي تلعبها واللي ناوي تلعبها، وتعرف ايش هي الألعاب المفضلة عندك وايش الألعاب التي تحب تقضي وقت فيها أكثر من غيرها. بما إنك (وللأسف!) ما حتقدر تلعب كل لعبة تنزل، الأفضل إنك ما تعطي معظم وقتك إلا للألعاب اللي تحبها أو اللي عجبتك أكثر من غيرها. عشان ما يجي الوقت اللي تلاقي عندك 10 العاب وما لعبت إلا شوي من كل وحدة فيهم! اقترح عليك إنك تعمل قائمة بسيطة لكل العابك اللي تلعبها حاليا وترتبها من الأقصر للأطول، وتبدأ تخلصها تدريجيا وتقضي وقتك فيها على أساس قائمتك. بكده ما حيكون استهلاكك للألعاب عشوائي، وحتحس أنك حققت شي وأنجزت لو التزمت بقائمتك وخلصت العابك كلها وصار عنك وقت تركز على الألعاب الكبيرة والطويلة، والألعاب اللي ما لعبتها أو الجديدة اللي جاية فالطريق.

3. خلي عندك ميزانية للألعاب

تحديد ميزانيتك وتوقعك للمبلغ اللي ناوي تصرفه كل فترة على الألعاب، بالإضافة إلى تنظيم الألعاب اللي ناوي تشتريها يفيدك كثير. لأنه مو كل الألعاب اللي تشتريها حتكون متحمس عليها بقوة من أول يوم تنزل فيه، ولازم تلعبها كلها وما تلعب غيرها فالفترة الجاية! لو شفت نفسك لسه ما خلصت العابك اللي تلعبها ونزلت العاب جديدة، إذا كنت متحمس لها مرة وحتلعب فيها أنت وأخوياك من أول يوم خذها واستمتع. أما إذا كانت الألعاب اللي نزلت مو ضروري بالنسبة لك أنك تلعبها في وقتها، اصبر عليها. لأننا كلنا نعرف إن عاجلا أو أجلا بيجيها تخفيض أو عرض Plus أو Games With Gold أو Steam Sale بعد فترة معينة من نزولها، أو ممكن حتى تلقاها مستعمله وتوفر مبلغ أكبر. وحط في بالك أنك كل ما وفرت في ميزانية العابك، كل ما قدرت تشتري العاب أكثر من نفس الميزانية ومن غير ما تأثر على فلوسك الثانية بشكل عام، بالإضافة إلى ميزة توزيع العابك على مدار السنة بدال ما تخلص كل شي من بدايته أو مع بعض، وتتأثر بأوقات نزول الألعاب وتأجيلاتها.

4. قيّم المحتوى الإضافي ومستوى الصعوبة لكل لعبة

حاول أنك تبحث عن أخبار ومعلومات المحتوى الإضافي وأي Season Pass ناوي عليه للعبة اللي تلعبها في مواقع الألعاب و YouTube أو Twitch قبل ما تدفع فلوسك وتربط نفسك فيه. لأن بعض المحتوى الإضافي للألعاب ما يكون مستواه بنفس مستوى اللعبة الأساسية، وبالتالي مايستاهل وقتك إلا لو أنت حاب إنك تخلصه. غير انه فيه ألعاب ينزل لها محتوى إضافي بشكل مستقل ممكن يجيك بعرض أو تخفيض في وقت لاحق. وكمان جرب أنك تفكر في أهمية مستوى الصعوبة عندك لكل لعبة تلعبها. لو أنت في بعض الألعاب ما يهمك صعوبة اللعبة قد ما يهمك أنك تخلصها، حاول تلعبها بمستوى الصعوبة الأقل من اللي أنت تلعبه فالعادة. هذا الشي حيقلل من الوقت اللي تستهلكه في إنهاء كل لعبة بشكل كبير، وبالتالي يساعدك في إنك تكون لاعب أسرع وتخلص العاب أكثر في وقت اقل من العادة.

5. فكر تشتري جهاز محمول للألعاب

صحيح إن الأجهزة المحمولة ما تعطيك نفس تجربة الأجهزة المنزلية أو الكمبيوتر الشخصي، لكنها تعطيك ميزة إنك تلعب لو أنت بره البيت أو حتى لو كنت مسافر! وهذي ميزة مفيدة للجيمر لأنها تزيد من وقت ومكان لعبه عموما، وممكن تعطيه تجارب جديدة وألعاب مختلفة عن تجربة الألعاب اللي يلعبها فالبيت قدام التلفزيون. بما إن أجهزة الألعاب المحمولة الأفضل حاليا (واللي ممكن تفكر تشتريها) هي 3DS و Vita. اقترح عليك تحاول إنك تحدد نوع التجربة اللي تبيها من جهاز ألعابك المحمول لأنها نوعا ما مختلفة في كل جهاز. Vita يعطيك ميزة انك تكمل العابك اللي الموجودة في PS4، وهذا شي ممكن يعجبك لأنه يخليك تكمل العابك في وقت ما يكون فيه التلفزيون متوفر أو بره البيت لو اللعبة فيها خاصية Cross Save. أو إنك تلعب العاب كونسول قديمة وأشياء مشابهة في باقي مكتبة العاب PlayStation. أما 3DS يعطيك تجربة مختلفة عن العاب الأجهزة المنزلية، منها لأنه بشاشتين والتجربة فيه عموما أقرب لتجربة جهاز الألعاب المحمول التقليدية ويعتبر انسب للعب وأنت خارج البيت، هذا بالإضافة إلى مكتبة العاب Nintendo الكبيرة جدا والمصممة أساسا لجهاز العاب محمول.

6. وازن بين الاونلاين والاوفلاين

الأجيال الحالية واللي قبلها من أجهزة الألعاب وحتى الألعاب نفسها شفنا فيها اعتماد كبير على الإنترنت. ومع إن هذا الشي إيجابي ويحسن تجربتنا للعبة ويزيد متعتها، لأنه يعطي المطور المجال انه يصلح أخطاؤه ويضيف على محتوى اللعبة، ويعطي الجيمر المجال إنه يشارك تجربة اللعبة مع أخوياه عن طريق الاونلاين. لكن لازم نلاحظ إن بعض الألعاب طور الاونلاين فيها متوسع جدا وكبير، وتحقيق إنجاز فيه يأخذ وقت وجهد، أو انه يكون فيه اللعب ما ينتهي زي العاب الكورة أو الشوترز مثلا. هذا الشي عكس طور الاوفلاين اللي غالبا ما يكون محدد ونسبيا أسهل إنك تنتهي منه، بالذات لو كنت تهتم بتجميع Trophies أو Achievements. اقترح عليك طريقة للموازنة بينهم وهي إنك تشوف الوقت اللي أخوياك يلعبوا فيه وتلعب معهم أونلاين، وتركز على الاوفلاين في أوقات ما يكون فيه زحمة فقائمة أصدقائك. وبكده حتكون أعطيت اللعبة حقها واستغليت وقتك اللي ما تلقى فيه أحد من قائمة أصدقائك بإنك تكمل قصة اللعبة أو تجمع كل Trophy أو Achievement.

7. حاول تشارك اللي حولك معك فالألعاب

الناس اللي ساكنين معك (أخوانك وأخواتك، أمك، أبوك، زوجتك، أولادك، الخ.) يشوفوك وأنت تلعب دايما، ولازم تحط في بالك إن الشخص اللي ما يعرف الشيء وما جربه صعب عليه انه يقدره زيك أو حتى يعرف قيمته، فبالتالي صعب تتوقع منه يحترم هوايتك ووقتك اللي تقضيه فيها. عشان تحل هذي الإشكالية، اقترح عليك إنك تحاول تخليهم يتفرجوا عليك وأنت تلعب فالبداية، وبعدها تشركهم معك في أوقات فراغهم. وطبعا تحتاج تشوف لهم العاب تناسبهم أو تثير اهتمامهم (زي العاب الرياضية، سيارات، طيارات، مضاربات، الغاز، لعب جماعي، الخ.) لكل شخص حسب مزاجه ونوع اللعب اللي يشوفه ممتع. حتلاقي إن هذا الشي ساعد اللي حولك كثير في انهم يقدروا هوايتك ووقتك اللي تقضيه في اللعب، وخلاهم ياخذوا انطباع أكبر وأفضل عن الألعاب. وممكن في أفضل الأحوال إنك تنجح فتحويلهم إلى جيمرز لو صبرت عليهم وخليتهم يشاركوك وقت لعبك في شي يعجبهم ويستمروا عليه وبالتالي وقت وفرص لعب أكثر بالنسبة لك.

طبعا كل هذي النصائح والحلول عامة لأن ظروف وحياة كل إنسان تختلف عن غيره. حاول أنك تأخذ منها الشي اللي تشوف انه يفيدك وطبقه على نفسك، ولا تنسى تشاركنا نصائحك الخاصة اللي بنيتها من تجربتك كجيمر فالتعليقات. أتمنى أني أكون ساعدتك ولو بشكل بسيط أنك تستغل وقتك وتستفيد منه أحسن استفادة، وبالتالي تقدر تلعب العاب أكثر وبطريقة أفضل.