محمد الدوسري
بوقتنا الحالي جالسين نمر بفترة اعادة اصدار الالعاب بشكل محسّن (Remake)، وشفنا العاب وسلاسل كثيرة تم اعادة اصادرها برسوم وتقنيات أفضل، منها الي أبهرنا بشكلها وتطورها، ومنها الي للأسف كان عار بتاريخ اللعبة. اليوم مقالتنا مختصة لألعاب عليها طلب كبيير من اللاعبين بأعادة اصدارها، وراح أذكر أيش الأسباب.
Shenmue 1&2 HD Collection
وحدة من أكثر السلاسل الي عليها طلب من اللاعبين, سلسلة شينمو من أكثر الالعاب الي سبقت وقتها: الحرية الكبيرة باللعبة، تغير الاجواء المستمر، مرور الوقت بداخل اللعبه, تتكلم مع المارة بالطريق وتتعلم شغلات كثيرة، غير القصة الجميلة وطريقة القتال باللعبة. كل هالميزات وغيرها الكثير الي تخلي اي شخص لعب السلسلة يتعلق فيها ويتمنى بيوم من الايام يعاد أصدارها. من أهم الأسباب الي يطمح لها جمهور اللعبه بأعادة أصدارها وهو نزولها بجهاز ما عاش كثير بسوق الاجهزة المنزلية (DreamCast), وصعوبة انك ترجع تلعبها لجهاز شبه منقرض..طلعت اشاعات كثيرة مع مرور الوقت ان مطوز وناشر اللعبة (SEGA) له نيه بأعادة احياء السلسلة، لكن ليومنا هذا مافيه اي شي يبشر بالخير لسلسله أسطوريه مثل Shenmue.
Final Fantasy VII HD
من فينا ما قد مر عليه أسم سلسلة (Final Fantasy) ؟ سلسلة غنية عن التعريف. للأسف في الآونة الأخيرة السلسلة ماهي جالسه تقدم اجزاء أسطورية مثل ما تعودنا عليها, لكن بعيدا عن وضع السلسلة الحالي فيه جزء واحد من عشرات الأجزاء الي نزلت لسلسلة فاينل فانتسي طالب معجبين السلسلة باعادة أصداره على مر السنين، وهو الجزء الاشهر بالسلسلة: الجزء السابع (Final Fantasy VII). الجزء هذا كان نقلة قوية بالسلسلة، رسوم اللعبة الخرافية بوقتها، عالم اللعبة الساحر والمميز بعالم الالعاب ليومنا هذا، غير القصه الي ما تقل جمال عن سلسلة فاينل فانتسي..من أهم الاسباب الي يتمنى معجبين السلسلة بأصدار هالجزء برسوم وتقنيات أفضل هو عالمها الخيالي. أغلب عشاق السلسلة متيقنين ان اللعبه بتكون بشكل ساااحر برسوم وتقنيات أفضل من نهاية جيل بلاي ستيشن 2 (PS2) الى يومنا هذا وحنا نسمع اشاعات بأصدارها بشكل أفضل، ولكن التصريح الي تعودنا عليه من الشركه الناشرة والمطورة للسلسلة (Square Enix) أن عملية أعادت اصدار اللعبه ماهو بالساهل مثل ما الاعبيين يتوقعون.؟!
The Legend of Zelda: Majora’s Mask 3DS
أسطورة زيلدا..كلنا يعرف ان أجزاء سلسلة زيلدا لا تحصى، لكن من بين كل أجزاء السلسلة فيه جزء واحد بس عشاق السلسلة ومن بينهم انا نتمى أعادت أصداره واللي هو (Majora’s Mask), الجزء الي يعتبر الأكثر غموضا بالسلسة، عالم اللعبة المختلف تماما عن أسلوب السلسلة، الشخصيات الجانبية الرهيبة، القصة الغامضة وتعدد الأقنعة وهدفك باللعبة يقرب يوم بعد يوم. كل هالعوامل خلتنا كمعجبين للسلسلة نتمى اعادة اصدارها. الغريب بالموضوع أن هالجزء يعتبر أكثر جزء لمحت له شركة نينتيندو بأعادة أصداره لأكثر من جهاز، بعد ما شفنا الريميك الخرافي للأسطورة Ocarina of Time على جهاز نينتيندو المحمول 3DS تحمسنا أكثر اننا نشوف اعادة أصدار Majora’s Mask ومن أهم الاسباب لأن كل اللعبتين نزلوا لجهاز الـ Nintendo 64. في الآونة الأخيرة طلع تصريح لمطور السلسلة Ejii Aonuma أنه يشوف ومتيقن من الطلب الكبير من عشاق السلسلة بأعادت أصدارها وهالشي يعتبر أيجابي. ننتظر ونشوف.
في الختام
هنا أنتهت رحلتنا لبعض من الألعاب الي عليها طلب كبير باعادة اصدارها. وش رأيك بأعادة أصدار لعبة أو سلسلة معينة؟ ووش هي الالعاب الي تتمنى أنك تشوفها بشكل وتقنيه أفضل؟ ياليت نشوف تفاعلك بالتعليقات.
بارعة
