Saudi Gamer
وأخيراً! وصلنا لأكثر جائزة متحمسين نعلن عنها، ومع اعلانها ننتهي من جوائز أفضل ألعاب هذي السنة، ونطوي صفحة السنة هذي وننتقل للي بعدها.
مثل ما ذكرنا في اعلان جوائز ألعاب السنة، هذي السنة هي أصعب سنة مرّت علينا من ناحية توزيع الجوائز. في هذي السنة، أعطينا 7 ألعاب تقييم أسطورية! كنّا متوقعين ان السنة هذي بتكون سنة خرافية لألعاب الفيديو، بما ان ابداعات ألعاب الفيديو تطلع في نهاية الجيل، بعد ما تنتهي موضة المطوّرين في اظهار قوّة الأجهزة في ألعابهم.
كل المرشحين والجوائز كنا نناقشهم نقاش سلس فيه تفاهم بين كل الأطراف، مع اختلافات قليلة جداً، باستثناء هذي الجائزة اللي طال النقاش فيها. شي طبيعي جداً، تعرفون ليه؟ لان طول هالفترة اللي راحت، 12 شهر، وحنّا نلعب ونقيّم ونتناقش في ألعاب ممتازة ورائعة، ولكن في نهاية السنة، شي واحد بيصير: الكل بيخسر، وواحد بس بينتصر!
جميع المرشحين اللي اختارهم كانوا مرشحين فعلاً للعبة السنة، ما كان فيه أي وجود للعبة تكملة عدد أو غيره. كل المرشحين ماخذين تقييم أسطورية في موقعنا، كل المرشحين سببوا ضجة كبيرة بين اللاعبين، كل المرشحين لهم جمهور كبير عريض من الآن يزعم ان لعبته هي اللي تستاهل لعبة السنة، بينما الألعاب الثانية ما تستاهل.
The Last of Us حصرية سوني اللي ختمت مشوار سوني بالحصريات أفضل ختام. Mario 3D World اللي أخيراً، وبعد انتظار طويل، نزلت لعبة ينتظرها الـWii U من طلع، لعبة الكل يقدر يلعبها، سواءً صغير أو كبير. The Legend of Zelda: A Link Between Worlds على الـ3DS واللي على انها لعبة جهاز ألعاب محمول، الا ان تجربتها كانت تمسح أغلب ألعاب الأجهزة المنزلية. أخيراً Grand Theft Auto V واللي بكل بساطة نقول عنها: من أضخم الألعاب في تاريخ ألعاب الفيديو.
الكثير ممكن يتساءل: Tearaway لعبة حلوة وممتازة وعلى العين والراس، لكن ليش تشوفون انها لعبة السنة؟ جواباً على هالسؤال المتوقع، جهّزنا لكم بعض الأسباب، ونقول “بعض” الأسباب:
عالم ساحر ما راح نشوفه لسنوات قدّام
العالم الورقي حق اللعبة، على اننا قد شفنا مثل هذا العالم في لعبة مثل Mario Paper، الا ان مثل هالعوالم نادر جداً ما تشوفه. ماهو بس كذا، ولكن العالم تم تصميمه بدقة متناهية: شكل الشلالات والوديان، شكل الحيوانات والكائنات، شكل الجبال والثلج، كل شي في عالم اللعبة سحرنا من أول ما شغلنا اللعبة.
أفضل استخدام لتقنيات PS Vita
البلاي ستيشن فيتا عنده خصائص ومزايا كثيرة، تقنية لمس أمامي، تقنية لمس خلفي، كاميرا أمامية وخلفية، وغيرها الكثير. كل هالميزات للأسف ضايعة أو يتم “تلفيقها” في الألعاب. هذي اللعبة هي الوحيدة اللي قدرت تستخدم كل هالقدرات بشكل مقنع جداً وبعيد عن التلفيق. جرّبت تضرب اصبعك من خلف الجهاز بحيث توصل ضربتك للأعداء؟ أو الأعداء اللي يتعلقون في الشاشة ويعيقون نظرك وتضطر تضرب الشاشة باصبعك عشان تطيحهم؟
أفكار جديدة ما شفناها قبل
بعض الألعاب تطلع لك بفكرة وحدة جديدة وتبني كل شي في اللعبة عليها. Tearaway أعطتنا أفكار جديدة وكثيرة: قصقصة الأوراق وصنع تصاميم منها وعرضها للناس حول العالم، صنع جميع شخصيات اللعبة من ورق حقيقي، ربط عالم اللعبة بعالمنا بصورة ما شفنا مثلها.
لعبة تأثّرنا بشخصياتها وقصتها
وهذا شي غريب، على ان اللي يشوف شكل الشخصية بيقول: “ياخي هذي لعبة أطفال!” ولكن من تشغّل اللعبة وتغطس في عالمها وقصتها، بتلاحظ انك بدأت تهتم بالشخصية اللي تلعب فيها. تحس انك نوعاً ما “مسئول” عن الشخصية. يا كثر ما فرحنا في كل مرة نحل مشكلة والشخصية تطالع فينا -ايه، تطالع فيك أنت ياللاعب!- بشكل يحرّك العاطفة، وتشكرك هي والموجودين في اللعبة على مساعدتك لهم.
أخيراً، هذي بعض الأسباب اللي حبينا نذكرها لكم، واللي بعد ما جمعناها مع غيرها من الأسباب، قررنا نختارها كأفضل لعبة في موقع سعودي جيمر لعام 2013.
شكراً Media Molecule على تقديمكم لنا أفضل تجربة لنا هذي السنة!
محمد ليلة