غلط اننا نسمي هذي لعبة، وبرضه غلط اننا نسميها ديمو. هذي على قولة كوجيما “تشويقة قابلة للعب” فقط. التشويقة القابلة للعب هذي كانت أكثرشي استمتعنا فيه هذا الشهر، أكثر من أي لعبة أو اضافة نزلت هذا الشهر.
المميز في التشويقة طريقة تقديمها. تم تقديم المحتوى (نسميها محتوى أفضل) خلال مؤتمر سوني في معرض جيمزكوم 2014 حصرياً على بلاي ستيشن 4، ومن استديو تطوير غير حقيقي اسمه 7780. اكتشفنا بعدها ان المحتوى هذا ماهو الا عبارة عن تشويقة فقط للعبة سايلنت هيل الجاية، ومن صنع هيديو كوجيما بالاضافة الى ناس معروفين في عالم الأفلام مثل Guillermo del Toro والممثل Norman Reedus من مسلسل The Walking Dead.
من أكثر الأشياء اللي ميزت التشويقة هي المكان البسيط اللي تلعب فيه، وهو عبارة عن “سيب” فقط، فيه بعض البيبان المقفلة. مهمتك انك تحاول تطلع من البيت هذا. وعلى انها مجرد تشويقة، الا ان كميّة الرعب اللي فيها توازي ألعاب رعب كاملة. تحمسنا كثير على الاصدار الكامل للعبة، ولو انه احتمال يكون مختلف اختلاف كبير عن التشويقة.
سوينا فيديو في قناتنا عنها، وحصل الفيديو على مشاهدات كثيرة ورهيبه.
بالاضافة الى كل هالأشياء اللي قلناها، فيه أشياء كثيرة رهيبه ثانية، مثل ان التشويقة كلها عشوائية، مثل الظهور العشوائي للجنيّه واللي ماهو مربوط بأي شي تسويه، ممكن تطلع لك في أي لحظة. برضه الى الآن مافيه حل ثابت للغز الأخير في التشويقة، كثير من الناس قدروا يطلعون من البيت بطريقة مختلفة.
التشويقة كانت ناجحة وأدّت غرضها، أعلن كوجيما اليوم ان التشويقة تم تحميلها مليون مرة على متجر بلاي ستيشن، وان عدد مشاهدات فيديو التشويقة تجاوز الثلاثين مليون مشاهدة.
كل هالعناصر خلتنا نختار P.T كأكثر شي استمتعنا فيه هذا الشهر، ولو انها ماهي لعبة… ولا حتى ديمو.
وش أكثر شي استمتعت فيه هذا الشهر؟
