شهر أغسطس كان مختلف عن باقي الشهور القليلة اللي راحت، واللي كانت فقيرة من ناحية الألعاب. الشهر هذا نزلت لنا أكثر من لعبة استمتعنا فيها، وخصوصاً نهاية الشهر نزلت أكثر من لعبة في وقت قصير.
ولكن، وعلى كثرة الألعاب أو قلّتها، لازم يكون فيه لعبة متميّزة لكل شهر. الشهر هذا فازت Splinter Cell: Blacklist بلقب لعبة الشهر.
الجزء الأخير من السلسلة، تغيّرت فيه أشياء كثيرة، وبرضو حافظت على الأشياء الرهيبة وطوّرتها. من الأشياء اللي تغيّرت هي وجود “مركز” لك تضبط فيه أمورك مثل تطوير الأسلحة والملابس وغيرها من الأشياء الرهيبة. فيه برضو من الأشياء اللي أعجبتنا التجربة السينمائية للعبة، وهذا الشي شفناه في الجزء اللي قبل، والحين حافظوا عليه وطوّروه للأفضل.
أما أرهب شي في اللعبة فهو الطور التعاوني (co-op missions)، كثيرة المهمات اللي تلعبها مع أخوياك ومتنوعة. كثير من اللاعبين فضّلوا الطور التعاوني على القصة نفسها حتى!
اللعبة بشكل عام تعطيك تجربة جيّدة الى ممتازة. اللي يحب ألعاب التخفّي والتسلّل طبيعي ان هذي راح تعجبه.
شهر أغسطس كان شهر جميل للاعبين، وبرضو نقدر نعتبره افتتاحية للزحمة اللي بنشوفها في الشهور الجاية.
وش كانت لعبة الشهر بالنسبة لك؟ شاركنا برأيك في التعليقات!
فيديو اللعبة
