ناقدة ألعاب طفشت من تهديدات اللاعبين لها، وقررت تتعامل معهم بطريقة رهيبه

اليوم عندنا خبر ظريف ومضحك. يقولك ناقدة ألعاب طفشت من كثر التهديدات اللي تجيها (تهديدات قتل واغتصاب) من اللاعبين على صفحتها في فيسبوك وغيرها، وقررت تتواصل مع أمهات اللي يهددونها ووثّقت الموقف بصور.

الناقدة الاسترالية، Alanah Pearce، تنقد الألعاب على يوتيوب وتويتر وفيسبوك وعلى قناة راديو استرالية. مثل أي ناقد أو ناقدة ألعاب في العالم، توصلها تهديدات بالقتل وان الشركات يدفعون لها ومن هالكلام، لكن البنت قررت تتخذ قرار يختلف هالمرة واتصلت على امهاتهم.

على تويتر، تقول ألانا: “أحياناً المراهقين على فيسبوك يرسلون تهديدات بالاغتصاب والقتل، لذلك قررت اني أبلغ أمهاتهم”.

هذي الصورة حطتها ألانا مع التويت، وهي صورة لمحادثتها مع وحدة من أمهات اللي أرسلوا لها تهديدات. ردة فعل الأم كانت غريبة شوي، بحيث شتمت ولدها واعتذرت لها ووعدتها انها بتتفاهم معه 🙂

التويت أو التغريدة هذي تم تفضيلها حوالي 60,000 مره، والناس سوولها ريتويت حوالي 36،000 مره.

على جريدة The Guardian المعروفة، قالت ألانا:

” قبل فترة، لاحظت ان اللاعبين اللي يرسلون لي هذا النوع من التهديدات المقرفة صغار السن. اكتشفت ان الكلام والنقاش معهم ما ينفع، ووصلت لنقطة اني ما عاد أقدر أتحمل تعليقاتهم ضدي”.

لذلك، قررت ألانا انها تتبع حسابات اللي يرسلون لها تهديدات، وحسب كلامها ان الوصول الى حساباتهم أمهاتهم ما كان صعب. تقول ألانا ان مو كل الأمهات ردوا عليها، وان اللي رد عليها أم وحدة الى الآن.

أخيرًا، قالت ألانا ان الموضوع هذا محبط ويفقدها الثقة، لذلك قررت انها تتخذ هذي الخطوة تجاه الموضوع.

وش رأيك في ردة فعل ألانا؟