الفكاهة والطرافة شي مهم في ألعاب الفيديو. وعلى انهم عنصرين مهمة، الا ان كثير من الألعاب تفشل في تحريك مشاعر اللاعب، سواءً كانت من ناحية طرافة أو حزن أو غيره.
Deadpool شخصية خيالية يعرفونها المهتمين بالكوميك، وفي هذي السنة نزلت على شكل لعبة. وعلى ان اللعبة كان مستواها متوسط، الا ان مستوى الفكاهة فيها خلاها تتميّز عن غيرها من الألعاب. Papers, Please! فكرتها من الأساس مضحكة، وهي انك تلعب على انك موظف جوازات وتحاول تمسك المخالفين، ويتطور الأمر معك الى درجة ان المخالفين يعطونك رشوات عشان تقدر تاخذ هالفلوس وتعيّش فيها أهلك!
FarCry 3: Blood Dragon من الاضافات المتميّزة واللي خلتنا نضحك كثير على الفكاهة اللي فيها، خصوصاً ان اللعبة تستهبل على نفسها في كثير من الأحيان. برضو من الأشياء الفكاهية اللي فيها الاستهبال على الألعاب الكلاسيكية. الركاز: في اثر ابن بطوطة -الحلقة الأولى- واللي ماهي لعبة مضحكة من الأساس، ولكن كثرة الأخطاء اللي فيها خلتنا نترك كل شي في اللعبة ونضحك على الأخطاء الطريفة اللي فيها.
كل الضحك هذا اللي ضحكناه، ما كان يساوي شي من الضحك اللي ضحكناه على اللعبة الضخمة Grand Theft Auto V. تميّزت السلسلة من عرفناها بالفكاهة والاستهبال، ولكن هذا الجزء وصلت الفكاهة والطرافة الى أعلى حد لها في السلسلة. شفتوا مواقف مايكل ديسانتا مع تريفور؟ أو مواقف فرانكلين مع صديقه لامار؟ كل هالمواقف، بالاضافة الى مشاهد كثيرة ثانية مضحكة في اللعبة، خلتنا نختار GTA V كأكثر لعبة ضحكتنا هذي السنة!
وش رأيك في GTA V؟ ووش أكثر لعبة ضحكتك هذي السنة؟ شاركنا رأيك في التعليقات!
