بمناسبة ابريل، استغل حساب Frostbite (المحرّك المعروف للعبة Battlefield) على تويتر وأرسل بعض المزحات الثقيلة شوي. بعد ساعات من السالفة، طلع بيتر مور (Peter Moore) مدير EA الشركة المالكة للمحرّك واعتذر عن الغلط.
التعليقات اللي طلعت حساب فروستبايت كانت شرسة وثقيلة، أولها كانت:” محرّك فروستبايت الآن يشتغل على الويي يو بما انه أقوى جهاز منزلي موجود. قدرنا نبرمجه لألعاب مثل ماريو وزيلدا”.
التعليق الثاني:” فروستبايت بيكون المحرّك اللي بيشغل لعبة هاف لايف 3 (لعبة ينتظرها لاعبين البي سي لسنوات طويلة)، وبيكون حصري على الويي يو”.
بعد ساعات من كتابة التعليقات تم مسحها، وبعدها بفترة بسيطة طلع بيتر مور يعتذر على تويتر. يقول بيتر:” نعتذر لزمائلنا ننتيندو وزملاءهم”. ووصف برضه ان التعليقات اللي صدرت من حساب فروستبايت بالـ”غبية وغير مقبولة”.
استغربت من التعليقات أول ما قريتها، صحيح ان EA مالها ألعاب بتنزلها على أجهزة ننتيندو، لكن هذا الشي ما يعطيهم الحق انهم يستهبلون على أحد. أما بالنسبة لاعتذار بيتر مور فهو قرار صحيح وزين انه قدر يلحق على الموضوع من بدري قبل لا يتصعّد الموضوع، لان موضوع مثل كذا احتمال يقلب الرأي العام للجيمرز ضد EA بكبرها.
وش بيكون موقفك لو انك مكان ننتيندو؟
