خمس أسباب تشجّعك على جمع التروفيز

أغلب اللاعبين يعرفون أن كل لعبة لها تروفيز أو إنجازات تجمعها من خلال أدائك للشروط حقتها، بس وشو الشي اللي يخليك تجمعها بغض النظر عن الجوائز اللي ممكن يعطوك إياها إذا جمعتها كلها؟

في هذه المقالة بأطرح لك عزيزي القارئ خمسة أسباب ممكن تخليك تصير تجمع التروفيز، بس قبل كذا خلني أقولك وشي التروفيز، وخلونا نبقى على مصطلح تروفيز بما أنه أكثر أنتشارًا:

التروفيز هي جوائز يحصل عليها اللاعب بعد ما يسوي شروط معيّنة، ويختلف شرط كل تروفي عن التروفي الثاني، فمنها السهل ومنها المتوسط ومنها الصعب ومنها الصعب مره وكل ما يكون أصعب تتغير قيمة التروفيز وتصير أعلى فمثلًا التروفيز السهل يكون تكون الجائزة كأس برونزي والمتوسط يكون باللون الفضي والصعب بالذهبي والأصعب يكون من البلاتينيوم وهذا ممكن ما يجي في كل الألعاب وطبعًا كل ما زادت الصعوبة زاد التحدي وزاد التعب 🙂

فيها تحدي بينك وبين خوياك

أحد أهم الأسباب اللي ممكن تخليك تجمع التروفيز هو أنك تتحدى خوياك في تروفيز معين وتشوف من يجيبه أول، وهذا شي يخليك تستمتع في اللعبة ويكون فيها تنافس بينك وبين خوياك حتى لو ما تلعبو مع بعض لأن وجود التروفي في حسابك دليل على أنك فعلًا أنجزت التحدي، وتغلبت على الباقين وتقدر تسوي بعد مقارنة بين التروفيز الخاصة بك والخاصة بخوياك في لعبة معينة وتشوف من أكثر أنت ولا هم

فيها هياط ومفاخرة قدام الناس

فيه بعض التروفيز تكون نادرة جدًا وممكن بعضها يكون نسبة اللي جابها في العالم 0.01% فلما تجيبها تحس إنك سويت إنجاز كبير وأنك من بين الناس كلهم قدرت تجيب هذا التروفيز فتقعد تهايط قدام الناس أو قدام اللي يشوف حسابك ويلقاك جبت هذا التروفي النادر جدًا. أو ممكن يلقاك جمعت مثلًا 5 تروفيز من النوع البلاتيني وهذا يعتبر إنجاز ومو أي واحد يقدر يجيب حتى بلاتيني واحد خصوصا في هذي الأيام.

تعطي اللعبة حقها

من أهم الاسباب أيضًا أنها تعطي اللعبة حقها لأن ممكن يكون في اللعبة خفايا حطها المطور بس أنت ما دريت عنها حتى ممكن تعيد تختيم اللعبة وأنت ما تدري أن فيه أشياء أخفاها المطور عشان تدور عنها من كنوز تجمها أو أوراق تكشف لك سر في اللعبة أو سلاح نادر مدسوس وأنت ما دريت عنه ألا بعد ما قريت التروفيز وبديت تدور عنه، ومثل لعبة Red dead redemption يوم بديت أجمع التروفيز الخاصة باللعبة أكتشفت أشياء كثيير مرة ما خطرت على بالي أنها موجوده في اللعبة ومن الأشياء الغريبة في اللعبة أكتشفت أن فيه ثلاث أحصنة نادرة أو في اللعبة وكل واحد في منطقة معينة وغيرها من الأشياء اللي أكتشفتها في اللعبة اللي ممكن يبيلي موضوع كامل عشان أكتب الأشياء اللي أكتشفتها بسبب تجميعي لتروفيز اللعبة.

وبعد ممكن تكون في قدرات للبطل بس أنت ما أستخدمتها لأنك ما كنت تتوقع أن لها فايده أو أن فيه قدرات ثانية غطت عليها فالتروفيز تجبرك تستخدم هذي القدرات كلها وبكذا تكون عطيت اللعبة حقها ، وغالبًا إذا أخذت كل التروفيز اللي في اللعبة فأنت تكون كشفت كل خفايا اللعبة وأكملتها بالوجه المطلوب.

تبعد الملل من اللعبة

أنا أحيانًا إذا بديت أمل من اللعبة أو أطفش منها أروح اشوف التروفيز الخاصة باللعبة عشان أحس أن فيه شي أسويه في اللعبة، أو إذا مثلًا ختمت اللعبة ولا عندي لعبة ثانية أروح أجمع التروفيز في اللعبة اللي عندي، ففمكن الواحد عشان يختم اللعبة ياخذ 15 ساعة بس عشان يجمع تروفيز اللعبة ممكن يقعد أكثر من 50 ساعة بدون ملل إلى أن يجمع التروفيز كلها، خاصة العاب العالم المفتوح بعد ما تختم اللعبة أحيانًا تبغى تسوي شي في اللعبة بس ما تدري وش تسوي, فهنا أنت عليك أنك تروح تجمع التروفيز لأنها بتضيف متعة كبيرة في اللعبة ولو نرجع لنفس المثال اللي في السبب السابق (Red dead redemption) كان فيه تروفي يطلب مني أذبح 10 دببة برية و10 دببة قطبية وكل واحد في منطقة في الخريطة وأحيانًا أقعد وقت طويل لين ألقى دب أو دبين وإذا لقيتهم فأحيانًا يذبحوني ويكون صعب علي إني أذبحهم فهذا اللي أقصده أنها تضيف جو ومتعة للعبة.

إثبات على إحترافك في اللعبة

غالبًا أي شخص يجيب البلاتينيوم (جميع تروفيز اللعبة) في أي لعبة دليل على أنه محترف فيها وممكن ما يكون هذا السبب الوحيد ولكن البلاتينيوم أو التروفيز الصعب اللي تجيبها في اللعبة هي إثبات على أنك فعلًا محترف في اللعبة.

مثلًا لعبة Prince of persia the forgotten sands كان أحد التروفيز في اللعبة يطلب منك أنك تذبح الوحش الأخير بدون ما يضربك ولا ضربة! والمشكلة أنك صعب تهزمه بدون ما تموت فما بالك إذا طلبوا منك تذبحه بدون ما يلمسك أو يدقك حتى بضربة وحده ! وغيرها من التروفيز اللي في اللعبة كانت صعبة جدًا وفعلًا كان لازم تكون محترف في اللعبة عشان تجيبها.

هنا وصلنا إلى نهاية المقالة هذي باختصار أهم خمسة أسباب من وجهة نظري ممكن تخليك تجمع التروفيز، إذا كان لديك تعليق على الأسباب الخمسة أو إذا تشوف فيه أسباب أخرى غير هذي الخمسة فشاركنا بها
وعطنا رأيك أنت عزيزي القارئ هل أنت من محبي تجميع التروفيز أو لا، إذا إيه فشاركنا بأصعب 3 تروفيات حصلت عليها وإذا لا فبرضو عطنا رأيك في التعليقات 🙂