أطلقت سكوير انيكس، ناشر اللعبة، عرض جديد وطويل للعبتها القادمة فاينال فانتسي 15.
في العرض الجديد، تقدر تشوف عالم اللعبة وتاخذ فكرة عن العالم المفتوح فيها. أتوقع من البداية تقدر تلاحظ جمال اللعبة.
الفيديو مافيه قتال، بما ان طريقة القتال عرضوها من قبل، لكن يعرض لك كيفية الاستكشاف في اللعبة وحجمها الهائل. حسب كلام مطوّري اللعبة، عالمها بيكون كبير لدرجة ان الاستكشاف فيه ممكن يكون متعب في حال كنت تمشي أو تركض، لذلك من الأفضل لك انك تستخدم السيارة.
تقدر برضه تشوف في الفيديو محطة بنزين، واللي بتقدر تستخدمها بحيث ترتاح فيها. فيه كائنات كبيرة في اللعبة، واحتمال تهاجمك اذا قربت منها، وقالوا انها قوية جدًا. أما بالنسبة للبنايات اللي تشوفها في اللعبة، فبعضها تقدر تدخله وبعضها ما راح تقدر.
تم عرض اللعبة في الليل، بحيث تشوف الكائنات الخطيرة اللي تطلع فيه، وقالوا انه من الأفضل ان اللاعب يروح لمحطة ويرتاح فيها الين ما يرجع النهار.
فاينال فانتسي 15 من أكثر الألعاب المنتظرة في السلسلة، بحيث جلست فترة طويلة جدًا تحت التطوير -كان اسمها Final Fantasy Versus -. قبل فترة تم تغيير المخرج وصارت تغييرات يبدو انها ايجابية للعبة.
وش رأيك بالعرض الجديد؟
