يقال ان مجتمع لعبة فاينال فانتسي 14 من أفضل المجتمعات اللي ممكن تشوفها في عالم الألعاب الالكترونية، ويبدو ان اليوم فيه دليل قوي يدعم هالكلام.
عن طريق منتدى اللعبة، وصل خبر للاعبين فاينال فانتسي 14 ان واحد من أخوياهم على باب الموت، لذلك قرروا يسوون له وقفة حياد أو جنازة، أو سمّها باللي يناسبك.
اللاعب هذا اسمه Codex Valhalla، وحسب كلام أخوياه في الصدق، تم ايصاله للمستشفى بشكل طارئ بعد ما طاح بشكل مفاجئ. بعد ما ودّوه المستشفى اكتشفوا ان عنده فشل كلوي -حمانا الله واياكم- وان الحادثة اللي صارت نادرة جدًا. تعقّدت حالته وساءت الين ما وصلت الأمور الى طريق مسدود. ماحد توقع ان حالته تسوء وتوصل للموت، لانهم كانوا مجهزين اخوه اللي كان جاي يبي يتبرع له.
عموماً، قرروا اللاعبين يودّعون اللاعب في لعبته المحبوبة، واللي وصل فيها الى مستوى (ليفل) 50. اجتمع اللاعبين وصار مشهد نادر ما تلقاه في الجيمز
تقدر تشوف باقي الصور اذا حبيت، والملفت للنظر في الموضوع ان عدد اللاعبين وصل الى درجة ما يحتملها السيرفر حق اللعبة، واستمر المشهد ليوم كامل حسب وقت اللعبة (يعادل 70 دقيقة).
فيه مجموعة ثانية من اللاعبين قرّروا يودعون اللاعب بطريقة ثانية، بحيث اجتمعوا في شاطئ في اللعبة وقرروا يطلقون Codex (طاقة سحرية على اسم اللاعب نفسه)
شي جميل اننا نشوف مواقف انسانية مثل هذي، خصوصاً في الألعاب الالكترونية.
أخيرًا، الوداعيات هذي وصل خبرها لأهل اللاعب، لكن ما وصل الخبر للاعب لأنه -للأسف- فارق الحياة قبل ما يصير الحدث 🙁
