Gamescom 2014أحداثمقالات

هل بتفوز Far Cry 4 بأفضل لعبة في سعودي جيمر؟ (تغطية جيمزكوم 2014)

farcry4pic

فار كراي 3 كانت أفضل لعبة في السنة في موقعنا. تفاجأنا فيها بما ان تركيز يوبيسوفت كان منصب بشكل شبه كامل على Assassin’s Creed 3. اللعبة كانت فعلاً ممتازة، وقدرت تتغلب على منافسينها الكبار في ذيك السنة.

السنة هذي بترجع لنا فار كراي من جديد بجزئها الرابع، بعد سنتين من التطوير.

فار كراي 3 كانت معروفة برسومها الممتازة، والجزء الرابع حافظ على هذا الشي وطوّره للأفضل. مراحل الثلج جميلة جدًا، خصوصاً وأنت طاير في الهوا. هذي كانت الجزئية الاولى من الديمو، أما بالنسبة للجزئية الثانية فكانت أجمل بكثير. صورة الموضوع مأخوذة من الجزئية الثانية، بحيث العالم ملوّن بألوان فاقعة ملفتة للنظر. أول ما شفتها التفت على المطوّر وقلت له ان شكل هالمرحلة جميل جدًا، ابتسم ابتسامة عريضة وقال أنا المسؤول عن رسم هذي المرحلة بالذات، وكلامك ريّحني كثير.

طريقة اللعب هي نفسها، لكن أضافوا عليها بعض التطويرات اللي تساعدك في اللعب.

حاولت أخلي المطوّر يتكلم بشكل واضح أكثر عن سالفة “العب بالطريقة اللي تعجبك” واللي يقصدون فيها الشركات بأن لك الحريّة فيه انك تتسلل وتتخفى، أو انك تلعبها بطريقة آكشنية. الى الآن ما شفت لعبة زي كذا، كل الشركات تسوّق الألعاب هذي على انك تقدر تلعبها بالطريقتين وبشكل متوازن جدًا، ولكن لمن أشتري اللعبة أكتشف انها مايلة لواحد من الاثنين، اما مايله للآكشن أو مايلة للتخفي.

من الاضافات الرهيبه في اللعبة، ان فيه عندك امكانية استخدام “نمر” يحارب معك في بعض المهمات. بدأنا الجزئية الثانية من الديمو ومعنا نمر مختفي، بحيث نقدر نأشر على عدو وهو يروح يتخلص منه. فيه ميكانيكيات رهيبه ثانية موجودة في اللعبة، لكن ما كشفوا عنها للآن.

بتنزل فار كراي 4 في 18-11-2014 على بي سي، بلاي ستيشن 3، بلاي ستيشن 4، اكس بوكس 360، اكس بوكس ون.

معلومة يمكن ما تهمّك: أول ما بدأنا نلعب، مشهور كان نازل على راس الجبل باستخدام الباراشوت ونزل بطريقة غريبة ولقينا نفسنا في مكان غريب. بعد عدّة محاولات، اكتشفنا ان الهبوط الغريب حقنا سبّب جليتش ودخلنا وسط الجبل. مشهور راح ينادي المطوّر بينما كاتب الكلمات غرق في دموعه من الضحك، لدرجة انه بالطقاق قدر يمسك نفسه قدام المطوّر 🙂

الوسوم
اظهر المزيد

محمد الشريف

كاتب ومدير تحرير موقع سعودي جيمر. أعشق ألعاب الفيديو من يومي صغير (ايه كلنا كذا)، أحب ألعاب التخفّي والرعب، وأعشق سلسلة Metal Gear ولعبة Silent Hill وICO.
إغلاق