E3 2014أحداثمقالات

تجربتنا للعبة Far Cry 4 (تغطية معرض E3 2014)

farcry4coverphoto

من المفاجآت الرهيبه في المعرض انهم جايبين ديمو للاعلاميين عشان يجربونه بنفسهم، عكس بعض الألعاب اللي فقط يخلونك تتفرج.

المهمة اللي لعبت فيها كانت رهيبه وتستعرض لك الأشياء الجديدة في سلسلة فار كراي. أول شي بتلاحظ ان تنفيذ المهمة ممكن بثلاث طرق: تخفّي، قتالي، وطيران.

أول شي جربته كان القتالي، وهو باستخدام فيل! ايه، تركب فيل وتسوقه، وتاخذه الى باب البلدة وتخليه يصدمها ويكسرها، ويبدأ الآكشن بعدها. فيه عندك الكثير من الأسلحة اللي تقدر تستخدمها: رشاش ثقيل، رشاش خفيف، وغيره من الأسلحة القتالية.

أما بالنسبة للتخفي فهو مضبوط أكثر من الجزء اللي قبل، عندك أماكن أكثر تتخفى فيها، وتحس انك تقدر تنفذ المهمة كاملة بدون ما تنكشف. مشكلة فار كراي 2 في التخفي اني كنت أحس انه ماهو تخفي كامل، رامين لك كم مكان تندس وراه بشكل عشوائي والباقي عليك. هذا الجزء احتمال كبير انهم يصلحون هالمشكلة.

أخيراً، الطيران ما قدرت أجربه للأسف بما اني طوّلت مرة وأنا ألعب، أحس اللي وراي يطالعون فيني وودهم يرموني برا المعرض 🙂

مظهر اللعبة جميل جداً، أجمل بكثير من فار كراي 3. أحب البيئات الخضرا والغابات وهالأشياء. هذي من أكثر الأشياء اللي أعجبتني في الديمو.

من بعض الملاحظات البسيطة في اللعبة، الذكاء الاصطناعي ما كان مضبوط. كثير من المرات لاحظت ان الأعداء ما يطلقون علي الا متأخر جداً، هذا غير اللي يركض بدون هدف وبشكل غريب. هذا العيب موجود في أكثر الديموز، وهذا واحد من أسباب تسميتها ديمو.

بتنزل فار كراي 4 في 18-11-2014.

الوسوم
اظهر المزيد

محمد الشريف

كاتب ومدير تحرير موقع سعودي جيمر. أعشق ألعاب الفيديو من يومي صغير (ايه كلنا كذا)، أحب ألعاب التخفّي والرعب، وأعشق سلسلة Metal Gear ولعبة Silent Hill وICO.
إغلاق