يزيد السويري
وأخيرا كشفت مايكروسوفت بالتعاون مع المطور Lionheads عن نوع لعبة Fable Legends واللي بتكون مجانية من نوع free-to-play.
لعبة Fable Legends بتكون أول تجربة للمطور في سوق الألعاب المجانية وهذا التوجه يختلف تماما عن طريقة الأجزاء الماضية في السلسلة سواء من ناحية اللعب أو في طريقة دفع المستهلك للعبة. المطور راح يستبدل الشخصيات الموجودة في اللعبة كل اسبوعين بطريقة مشابهة للعبة League of Legends. الطريقة باختصار هو أن اللعبة في البداية بتقدم لك اربع شخصيات تلعب بها ببلاش وبعد أسبوعين هذه الشخصيات بتتغير ويجي غيرها وبتستمر هالحركة طول ما سرفرات اللعبة شغالة.
لكن إذا بغيت تفتح شخصية بشكل دائم تلعب فيها وقت ما تبي لازم يا أما تدفع بعملة اللعبة أو بفلوس صدقية. وبكذا تحافظ على شخصيتك والمستوى حقها والمعدات اللي فتحتها للشخصية.
بالنسبة للي يفضلون يلعبون بدور الشرير اللي تختلف طريقة لعبه عن الأبطال بحيث ان التصوير يصير من فوق بطريقة تشبه الألعاب الاستراتيجية بحيث تحط عقبات وحواجز ووحوش بإمكانهم يشترون الكائنات اللي يبون يستخدمونها.
إذا لعبت بدور الشرير بتمشي في القصة طبيعي زي ما لو كنت تلعب البطل. كل مهمة لها فخوخها وعقباتها وحوشها الخاصة اللي تقدر تستخدمها وهذه الوحوش والأدوات بتكون مجانية للأبد. لكن إذا حبيت تستخدم وحوش وأدوات غير الوحوش والأدوات المخصصة لهذه المهمة لازم تفتحهم إما عن طريق عملة اللعبة أو تدفع فلوس صدقية.
في هذه المهمات بيكون فيه صناديق موزعة في المرحلة متنوعة بثلاث تصنيفات تختلف كل وحدة عن الثانية بجودة الغرض اللي يعطيك اياه كل صندوق. داخل الصناديق هذه بتلاقي إما أسلحة أو دروع أو أدوات أو أدوية أو فضة ( الفضة هي عملة اللعبة ). هذه الصناديق بتلقاها أثناء لعبك للمهمات لكن برضو تقدر تشتريهم من القرية حقت اللعبة سواء بعملة اللعبة أو بالفلوس الصدقية.
أيضا المطور مخطط أنها يضيف شخصيات وخلوقات ومهمات وفصول جديدة على شكل مواسم. من ناحية القصة اللعبة بتتبع نهج ألعاب شركة Telltale بحيث أنها بتكون على شكل حلقات وحاليا يتم التخطيط لأكثر من موسم واحد.
اللعبة مصممة بحيث تشجع اللاعبين يبحثون عن صناديق ما يلقونها إلا في المهمات فقط. بعض الصناديق تعطيك اغراض معينة يبيها اللاعب وهذا يخلي اللاعب يعيد المهمة ويفتح نفس الصندوق لين يطلع له الغرض اللي يبيه. الغرض اللي يطلع لك من كل صندوق بيكون عشوائي لكن بعض الصناديق تتميز بأنها تحتوي على أغراض نادرة وقوية تظهر للاعب بشكل عشوائي بعد كذا مرة من فتح الصندوق.
أيضا اللعبة مصمممة أنها تسمح للاعبين بمختلف المستويات أنهم يلعبون مع بعض الأفضلية في اللعبة هي لكلاس الشخصية وليس مستواها. مثال مهما قويت في شخصية المسعف ما راح تصير أقوى من شخصية الساحر أبدا.
أيضا ملاحظة مهمة وهي أن اللعبة ما تسمح للاعب يشتري اغراض وسط المهمة اللي يلعبها مثلا قربت تنهزم في المهمة ما يمديك تشتري أدوية وعلاجات لشخصيتك. أيضا الأدوات والمعدات اللي تحطها لشخصيتك لازم يكون مستواها مطابق لمستوى شخصيتك يعني ما ينفع تحط سلاح مستواه عالي مرة لشخصيتك اللي مستواها ضعيف.
وش رأيكم شباب بتوجه اللعبة الجديد وهل في أحد أحبط وقرر يهون عن لعب اللعبة أو لا؟ شاركونا أرائكم في التعليقات.
بارعة
احمد خالد
محمد ليلة