مقالات

وش السر الرهيب في دقّة وسرعة اطارات لعبة The Order 1886؟

TheOrder1886

صار خلاف حاد بين اللاعبين حول العالم وخصوصا اللاعبين العرب بسبب ان حصرية البلايستيشن القادمة The Order 1886 حتشتغل بدقة 800p و اثار هالشي غضب بعض من عشاق البلايستيشن و شافه عشاق الاكسبوكس كفرصة للدفاع عن الاكسبوكس اللي اغلب العابه الحالية تعمل بدقة 720p لكن السؤال اللي لازم ينطرح هل 800p تعتبر سيئة ؟ خصوصا ان ذي اوردر تشتغل بثلاثين فريم وهو شيء غير مقبول بالنسبة للجيل الجديد !

الجواب المختصر هو لا الدقة وسرعة الاطارات هذي ممتازة للعبة هذي بس .. كيف ؟ هات زمزية شاهي مثل حقت ريان الدويش وتعال اشرح لك 🙂

ايش تعني 800 و 720 و 1080 تقنيّا وهل تختلف من لعبة الى اخرى ؟

1080p هي الدقة اللي ابعادها  (1920 عرض و 1080 ارتفاع )  و 720p اللي ابعادها (1280 عرض و 720 ارتفاع ) ومثل ماتلاحظ يستخدمون الارتفاع كرمز للدقة مثل 1080p اي 1080 صف من البسكلات

1080p

لكن في شي مشترك بين هالدقات و مو موجود في لعبة The Order 1886

التناسب … كل الدقات الي ذكرتها في الاجابة السابقة لها نفس تناسب الارتفاع مع العرض وهو 1.78:1 ( ويسمى بمقاييس اخرى 16:9 ) والرقم هذا يعني ان العرض اللي هو 1920 يعادل الارتفاع 1080 مضروب في 1.78

و التناسب يقرأ هكذا (الارتفاع : العرض بالنسبة للإتفاع ) وقس على ذلك بقية الدقات المذكورة سابقا وبقية دقات الالعاب اللي صرنا نشوفها في الجيل الجديد مثل Titanfall اللي تشتغل بدقة غريبة 792p

و Watch Dogs اللي حتنزل هاليومين بدقة  900p على البلايستيشن فور و 792p على الاكسبوكس ون

ايش هو تناسب ذي اوردر وليش مختلف عن البقية ؟

تناسبها هو 2.40:1 ولو حسبناها وضربنا الارتفاع 800 في 2.4 حيطلع العرض 1920 … نعم نفس العرض حق ال 1080p … طيب ليش ؟ لان اللعبة ستايلها سينمائي في كل النواحي وجالسين يعاملونها كفلم

وعشان الكاميرا تكون بأبعاد سينمائية لازم يكون تناسب العرض والطول سينمائي وهم اختارو 2.40:1 وعلى فكرة التناسب السينمائي انواعه كثيرة وليس فقط هذا التناسب – هذا مثال من فلم skyfall يستخدم نفس التناسب

skyfall-aspect

طيب واذا كان العرض ١٩٢٠ يبقى المقاس ناقص بالارتفاع !

صح لكن جودة الصورة وحدتها تعادل جودتها لو كانت 1080p لان الفيديو ال HD تتغير دقته عندما يكون عرض الفيديو مختلف عن المقياس الرسمي اللي هو 1920 لل Full HD او 1280 لل HD

هم قصوا صفوف البكسلات 140 صف في الجزء العلوي و 140 صف في الجزء السفلي بسبب ان ستايل اللعبة سينمائي. اما الالعاب الثانية اللي تناسبها تلفزيوني عادي اللي هو 1.78:1 تلاقي العرض فيها اقل من 1920

فمثلا Titanfall و Watch Dogs على الاكسبوكس ون العرض فيهم الاثنين 1410 فقط وكذا لما تشغلها على تلفزيون Full HD 1080p .. حتنمغط الصورة اللي دقتها 792p على مقاس 1080p وكذا حتتكسر البكسلات وتفقد الصورة

حدتها على الشاشات الكبيرة خصوصا لما تكون اللعبة فيها تفاصيل دقيقة مثل Watch Dogs .. فلعبة The Order 1886 تجاوزت هالمشكلة بانها تغير التناسب المعتاد عشان تحافظ على العرض والفريمات

لكن السبب اللي الكثير مايعرفه هو

استخدام هذا التناسب ليس فقط عشان الطابع السينمائي للعبة وطريقة التصوير فيها والحفاظ على حدة الصورة بل ايضا لتقليل عدد البكسلات المستخدمة وكذا حيقل الضغط على ذاكرة ومعالج الجهاز وبالتالي يقدرون يرفعون

جودة الجرافكس اللي وصلت لمرحلة خرافية وبنفس الوقت يبقون محافظين على سرعة الفريمات. وايضا المطور قال ان الهدف الرئيسي من اختيار هالنمط والتناسب السينمائي انهم يبون يشغلون اللعبة بسلاسة مع تنعيم قوته 4xMSAA وكذا تكون المجسمات حادة الحواف بعكس لو سووها على 1080p حيضطرون يخلون التنعيم طايح مثل ماهو صاير مع كثير من العاب البلايستيشن ثري اللي شفناها عشان يزيدون سرعة الفريمات ( انا شخصيا التنعيم مهم بالنسبة لي خصوصا مع العاب بتفاصيل عالية مثل هذي ).

ممتاز، لكن مازالت اللعبة 30 فريم وهذا مزعج للاعبين

هنا اختلف معك وبقوة اللعبة لو كانت ٦٠ فريم حينعدم الستايل السينمائي كله اللي تعبوا عليه لان اصلا الافلام يصوروها بسرعة ٢٤ فريم بالثانية وماراح اشرح ليش هالرقم بالذات لانه موضوع مختلف ماله علاقة

لكن خلاص هالرقم شغالين عليه من حوالي ١٠٠ عام او ربما اكثر فتعودنا عليه والستايل السينمائي حينعدم لان ماحيصير بالصورة شي اسمه Motion Blur او التشوه في صورة الاجسام اثناء حركتها بسبب قلة الفريمات و لاننا تعودنا على الافلام  ، احساس الموشن هذا لازم يكون موجود باي لعبة سينمائية ولو كانت 60 فريم لصارت كأنها مباراة كورة مافيها اي طعم للفلم وهذي كلها مساءل ذوقية لكن كونها لعبة سينمائية وبرأيي الشخصي ماعمري شفت لعبة بطابع سينمائي فيها حركة كاميرا خرافية مثل ماشفت بلعبة ذي اوردر بل ارى انها تضاهي الكثير من الافلام خصوصا ان المطور استعمل كل شي في تقنيات صناعة السينما مثل الالوان وال Film Grain اللي هي الحبيبات اللي نشوفها في الافلام القديمة.

وهذا مثال للشتويه من فلم Skyfall

skyfall-MotionBlur

طيب ياخي كان خلوها ستين فريم وحطو الموشن كتأثير

صح ممكن لكن تقنيا لما تحط الموشن كتأثير حتنزل الفريمات اوتوماتيكيا ( وتقدر تختبر هالشي في العاب كثيرة عالبي سي فيها خيار انك تشغل الموشن وتقفله )  وهذا اللي سووه لكن ماهو السبب الرئيسي اللي نقص الفريمات فيها بل هو زيادة التفاصيل في الشخصيات والبيئة والمؤثرات اللي في اللعبة لاني اتوقع ان البلايستيشن فور قادر على تحمل القليل من تأثير الموشن 🙂  شوف العرض الاخير اللي بثوه على تويتش وشوف الانفجارات اللي تسببها الاسلحة اللي تبين ان اللعبة مو بطيئة بالاضافة الى الموشن.

فائدة اخرى ايضا من استخدام هذا التناسب

التناسب السينمائي يعطيك مجال رؤية واسع او مايسمى بالتأثير البانورامي وبغض النظر عن جمال وروعة هذا التأثير في السينما الا انه مفيد لنا كلاعبين وهو ان مدى الرؤية حيصير عندنا اوسع وافضل خصوصا في القتال بالاماكن الضيقة ولاحظ بالفيديو السابق والصور التالية كيف تصير الرؤية بعد مايقرب التصويب حتشوف الشخصية على احد الجوانب مع الحفاظ على مدى الرؤية

TheOrder-WideViewRangeTheOrder-WideViewRange2

العيب الوحيد

انا ما اشوفة عيب بل اشوفه ميزة بالنسبة لي لكن كثير يكرهونه بشكل كبير جدا في الافلام وهو وجود الفراغات السوداء اعلى واسفل الصورة بسبب الاقتصاص اللي صاير لان الجهاز يعرض على تناسب 1.78:1

والشاشات التلفزيونية كلها تناسبها 1.78:1 ويتضايق الناس من هالشي لانهم يحسون ان الصورة ضيقة وصغيرة بالنسبة لهم .

الزبدة

الدقة هي نفسها 1080p لكنها فقط مقصوصة من الاعلى والاسفل .. يعني الجودة والحدة ماتغيرت

و انا شخصيا مرة متحمس لهاللعبة لانها قدمت شي ابيه في الالعاب من بديت شغفي بالتصوير السينمائي وسعيد انهم حافظوا على العرض اللي هو 1920 وماضحوا فيه عشان كم فريم لكن كل اللي اتمناه

ان الفريمات تكون ثابته على ٣٠ فريم وبدون مشاكل واخطاء خصوصا ان معاهم وقت لانهم ماعلنوا موعد اطلاق اللعبة حتى الان ونصيحة اخيره قبل لاتزعل على انخفاض دقة لعبة شوف كم عرض الصورة حيكون اذا كان 1920 او شي قريب مره فتطمن وايضا حاول ماتعطي حكم نهائي من يوتيوب لكن بعد ماتلعبها ويارب تطلع القصة تستاهل كل هالتعب في جمال اللعبة

انت وش رايك ؟ تشوف ان المطور توفق وضرب شجرة عصافير 🙂 بحجر واحد يوم استخدم هالنمط السينمائي والتناسب حقه والا لا ؟

الوسوم
اظهر المزيد

ثامر الفريجي

متخصص في الانتاج السنمائي واعمل حاليا كـ Cinematographer و Motion Designer اعشق التصوير السينمائي و الموسيقى و ألعاب الفيديو , مشرف سابق في مجتمع سعودي قيمر على قوقل بلس
إغلاق