خلال زيارتي لباريس الشهر الماضي لتجربة لعبة Watch Dogs، أجريت مقابلة مع مصمّم اللعبة (أو Lead Game Designer) داني بيلانقر (Danny Belanger) وسألته عدّة أسئلة مرتبطة في اللعبة، أغلبها حول أشياء كنت شايل همها. للأسف كان الوقت المسموح لي ضيّق جداً، لكن قدرت استخرج أكبر قدر ممكن من المعلومات اللي تهمّنا:
في البداية حاب أسألك عن أسباب تأجيل اللعبة، هل كانت لأنكم غير مقتنعين بجودة اللعبة فقط مثل ما صرحتوا، أو أنه فيه أسباب ثانية مثل تجنّب زحمة موسم الأعياد؟
التأجيل كان مرتبط بعدم اقتناعنا بجودة اللعبة فقط. كان عندنا رؤية معيّنة للعبة ولكن يوم قرّب وقت اطلاقنا سألنا انفسنا “هل فعلاً هذي هي اللعبة اللي كنا نأمل نطلقها للناس؟” وحسينا اننا ما وصلنا للي كنا نأمل له، وبالتالي قررنا نقضي وقت أكبر في تطوير اللعبة.
ما تعتقدون انكم عرضتوا جزء كبير من اللعبة لدرجة ان الناس تشبّعوا منها قبل ما تنزل؟
اعتقد ان اللعبة ما زالت تحتوي على محتويات كثيرة ما انعرضت في اليوتيوب سابقاً، مثل لعبة العنكبوت الآلي اللي شفتها اليوم في اللعبة. راح تتفاجأ بكمية الأشياء الموجودة فيها بعد ما تجرب النسخة النهائية منها.
لكن لاحظنا تكرير كبير من ناحية اللعب، وهالشي أدّى الى انه يكون فيه تخوّف ان اللعبة النهائية تكون مكرّرة وغير ممتعة
سمعنا عن هذا الشيء لكن قضينا وقت كبير في محاولة التنويع في محتوى عالم اللعبة. اللي اظهرناه كان جزء بسيط منها وما حبينا نفسد تجربة اللعبة في اننا نعرض للناس أكثر من اللازم.
لاحظت خلال لعبي ان البطل قوي جداً، تقريباً يقدر يخترق كل شي وهالشي يسهّل له المهام بشكل كبير. ما تشوفون انكم اعطيتوه قدرات أكثر من اللي يحتاجها؟
لا أبداً. في الديمو اللي لعبته هنا كان فيه أشياء كثيرة متاحة لك من البداية عشان تجربها، لكن في اللعبة النهائية بتحتاج انك تفكّها بنفسك مع الوقت. بالاضافة الى ان المراحل المتقدمة بتكون فيها تحديات أكبر بغض النظر عن القدرات اللي معك.
بس برضه – في المهمة اللي لعبتها على الأقل – كنت أقدر أعلّق على حركة وحده أو حركتين وأنهي المهمة فيهم
صمّمنا المهام بحيث تقدر تخلّصها بأكثر من طريقة. ما نعتقد ان اللي ذكرته عيب في اللعبة. اذا فيه لاعب يبي يعلّق على حركة او حركتين عشان ينهي المهام، فهذا شي راجع له. في النهاية البعض راح يفضّل انه يتخفّى عشان يخلص المهمة، وغيرهم يفضّل يستخدم الاسلحة، وهكذا.
نظام السمعة في اللعبة، هل راح يكون له تأثير على سير القصة؟
نظام السمعة (Reputation System) بيأثر بطريقة تعامل سكّان المدينة معك. بتلاحظ انهم بيكونون متسامحين أكثر معك في حال كانت شخصيتك طيّبة، وبيخافون منك وممكن يبلغون عنك اذا كنت شخصية شريرة. (احسّه راوغ السؤال وما امداني اسأله مره ثانيه لضيق الوقت)
المهمّات الشاطحة مثل مهمّة العنكبوت الآلي أو مهمة قتل الزومبيز ما تشوف انها ممكن تطلّع اللاعب من جو اللعبة بما انها غير واقعية؟
هي فعلاً غير واقعية لكن هدفنا منها كان ان اللاعب يعتبرها كـ”تغيير جو” اذا حس انه قضى وقت كبير في لعب اللعبة، وحب يغيّر شوي. وطالما انها مهام جانبية فما نعتقد انها تأثر في واقعية عالم وقصة اللعبة.
هل أجوبته زادت حماسك للعبة؟ في حال كان عندك اسئلة اضافية عن اللعبة فبإمكانك تكتبها في التعليقات، ممكن أقدر أجاوب عليها من خلال تجربتي لها.
