صرّح ستديو تطوير Evolution Studios مطوّر لعبة درايف كلوب ان أغلب لاعبين اللعبة الآن يقدرون يشبكون أونلاين في اللعبة، بعد طول انتظار.
اللي ماهو لاحق على السالفة، اللعبة عانت من مشاكل في السيرفرات من وقت اطلاقها، واللي تسبب في عدم قدرة الناس على الدخول اونلاين، وبكذا فقدوا كل ميزات الأونلاين. لعبة درايف كلوب تعتمد بشكل كبير على خدمات الأونلاين لان معظم ميزاتها (مثل تكوين النوادي والخواص الاجتماعية) ما تشتغل الا اذا كنت شابك اونلاين.
يقول مطوّر اللعبة: “لا زلنا نحسّن خدمات السيرفرات اللي عندنا عشان نخلي الكل يقدر يشبك اونلاين، لكن حالياً معظم اللاعبين يقدرون يدخلون اونلاين في اللعبة. فيه تحديثات جايه للسيرفرات حقتنا خلال عطلة هذا الأسبوع، لذلك طالما اننا جالسين نصلّح فاحتمال تواجهون بعض المشاكل في السيرفرات، ولكن أرجوكم حاولوا تشبكون مره ثانية في السيرفرات (يقصد اذا ما قدرت تشبك من أول مرة)”.
ذكر المطوّر انهم يشتغلون على تصليح تسجيل الدخول في السيرفرات، السباق عن طريق الأونلاين، وقائمة مراكز اللاعبين، وشكر اللاعبين اللي صبروا على اللعبة واللي ارسلوا لهم رسايل استفادوا منها.
وش رأيك في وضع درايف كلوب؟
