أخبار

مطوّر محرك Unreal Engine 4 يحفّز المطوّرين عشان يستخدمونه في تطوير ألعابهم

Unreal-Logo-Cover-Photo

ستديو ايبيك للالعاب (Epic games) جهز ميزانية بقيمة 5 مليون دولار للمطورين اللي يطوروا العابهم باستخدام محرك انريل انجين 4 (Unreal Enigne 4). مطوري المحرك يبغوا يساعدوا المطورين وبدعموهم في تطوير العابهم، هذا الشي راح يفيد ايبيك من ناحيتين، الاولى ان المطورين راح يصمموا العاب رهيبة بهذا المحرك والثانية ان هذي حركة تسويقية للمنتج و مصممين اكثر راح يجربوه بعد هذا الاعلان.

قال تيم سويني (Tim Sweeney) احد مؤسسين استديو ايبيك: “افضل شي بعرضنا ان مافي اي قيود على المطور، اسم اللعبة راح يكون ملك لك، وحقوق النشر ملكك وكل الارباح اللي تحققها تقدر تصرفها بكيفك وتتحكم فيها بشكل كامل. هدف ايبيك ببساطة هو مساعدة المطورين اللي يستخدموا محرك انريل انجين 4 للوصول للنجاح، لان لما انت تنجح كمطور احنا ننجح ايضا”

و وضحت ايبيك ان حتى المطورين اللي عندهم مشاريع على مواقع مثل كيك ستارتر (Kickstarter) واندي قوقو (Indiegogo) ومواقع غيرها تشبهها راح يتم دعمهم بشرط ان اللعبة يكون لها نموذج تجريبي ويكون شغال. الدعم من ايبيك لكل مطور راح يكون بين 5000 دولار الى 50000 دولار وراح يتم توزرعها بناء على جودة المنتج ككل.

قال تيم: “تطوير اللعبة غالبا يحتاج فقط الى ابتكار و العمل على انهاء اللعبة مع وضع هدف محدد لها. لكن بعد ماتنتهي من تطويرها راح تحتاج الى اعلانات لاطلاق اللعبة واللي غالبا يحتاج فلوس اكثر. هذا الشيئ احنا عارفينه، و قد بنينا العاب على ميزانيات بسيطة ويكون تمويل اللعبة عن طريقي او عن طريق شخص اسمه مارك رين (Mark Rein). ميزانية صغيرة ممكن تصنع الفارق في شحن اللعبة، والتسويق لها، و شراء المواد اللي تحتاجها لصناعة اللعبة، وترقيات مهمة للتسويق للعبة لكي تجذب الناس بالشكل المطلوب”

كمل تيم: “ببساطة خلي ببالك جملة ان نجاحنا يعتمد على نجاحك. احنا نقدر نعطيك الدفعة اللي تحتاجها لكي تاخذ مشروع لعبتك الى مابعد طور النموذج التجريبي. ايبيك تبغاك كمطور انك تركز على الجانب الابداعي و تقلل مخاوفك حول تسويق اللعبة و انتشارها”

تيم وضح ايضا انهم مو بس مهتمين بمصممين الالعاب، قال تيم: ” احنا نحب الالعاب بالتاكيد، لكن احنا ايضا نبغا نشوف رسومات مميزة، ورسومات معمارية رهيبة، محتويات لمكان العمل، مودز -Mods- و اي شي راح يخلينا نقول واو”

خبر محمس للمطورين واذا كنت انت احد المطورين انصحك تجرب تشارك معاهم لانك ماراح تخسر شي.

اش رايكم هل بتجربوا تشاركوا؟

الوسوم
اظهر المزيد

أحمد قربان

طالب جامعي ، يدرس في جامعة الملك عبدالعزيز بجدة ، تخصص هندسة صناعية ، اعشق العاب البلايستيشن و مدمن فيفا ، احب العاب الاكشن و المغامرات واي لعبة فيها كريتفتي او شيئ جديد
إغلاق