اليوم راح اكتب مشكلة واجهتني شخصيا في لعبة FIFA 15، المشكلة الى الان مستمرة. ماودي اشكي لكم عن مشكلتي مع اللعبة و اضيع وقتكم لكن الهدف من المقالة هو اني اني ابغا احذركم من تعامل شركة EA وبالتحديد قسم الدعم والمساعدة في لعبة فيفا.
تحديث: بعد ردود الشباب عرفت الحل، الحل اني اغير شركة الانترنت تبعي، واضح ان المشكلة من شركة زين لاني بمجرد ماشبكت الجهاز بشركة ثانية قدرت العب فيفا اونلاين بدون اي مشاكل.
المشكلة بدأت من يوم الاربعاء الماضي، كنت ابغا العب فيفا اونلاين، وكالعادة شغلت اللعبة وبدأ يتصل بالسيرفرات، وفجأة كتبت لي اللعبة اني لازم اسوي عضوية بموقع اوريجين (Origin) تبعهم، مع العلم اني مسجل في اوريجين واللعبة شغالة معي من يوم نزلت بدون مشاكل. قلت بنفسي ممكن في مشكلة في سيرفراتهم كعادة EA و مالي الا اصبر لبكرة بالكثير تتصلح. جيت الخميس واشغل اللعبة و اواجه نفس المشكلة! قلت مالي الا اني اكلم EA نفسهم واقولهم يحلوها.
تواصلت مع EA ودخلت على قسم المساعدة و عندهم قسم يسمح لك تتكلم مع موظف في دردشة مباشرة، دخلت هذا القسم و انتظرت حوالي نص ساعة الى ان كلمت احد مع العلم ان مكتوب الوقت المتوقع للتحدث مع الموظف هو من 5 الى 10 دقائق فقط!
بدانا المحادثة وبدا يطلبني توضيح المشكلة، وضحت مشكلتي له و رد وقال لي لاتخاف راح تنحل مشكلتك، قلت بنفسي والله واضح انهم واثقين وفاهمين الشغلة ومتمرسين. قالي دقيقة اشوف لك الحل، وفجأة كتب لي طلب غريب وقال لي ابغاك تحذف مستخدمك (User) من الجهاز! استغربت وقلت بنفسي يالله بس اجرب واشوف اش راح ينحذف اذا مسحت اليوزر، جيت احذف اليوز قام البلايستيشن كتب لي تحذير ان كل بياناتي و ملفات التخزين و الفديو والصور راح تنحذف، بدأت اخاف واتردد و قلت في نفسي هذا جهدي ولعبي قهر لو اتمسح، رجعت للموظف و قلت له هل لازم احذف اليوزر مافي اي حل ثاني؟ رد وقال يب احذفه الان.
توكلت وحذفت اليوزر وقلت بنفسي يالله مو مشكلة اهم شي تنحل المشكلة، و بعد ماحذفته كتب لي الموظف وقال هيا ارجع سويه من جديد و ادخل فيفا وشوف تقدر تلعب اونلاين ولا لا، سويت طلبه ودخلت فيفا على امل ان المشكلة تصلحت ولكن للاسف نفس المشكلة مستمرة 🙁
رجعت للموظف و قلت له ما انحلت المشكلة، بعدها الموظف ماعرف اش الحل، وكتب لي انه راح يرسل المشكلة للمختصين و يتواصلوا معي لحلها، رديت عليه وقلت له يعني الان انا مسحت كل بياناتي على الفاضي! رد واعتذر لي عن هذا الشيء، قلت له لا تعتذر لي، اعتذر على ساعات اللعب اللي قضيتها و اتمسحت هدر، وكتبت له اني صراحة غير سعيد من اني حذفت يوزري و ما انحلت المشكلة، المهم حاول يحل الشكلة ورد لي بأنه راح يكلم زميله لمساعدته، وجاب لي حل بدائي جدا وهو اني اقفل البلايستيشن وافصل اسلاكه لمدة 30 ثانية وارجع اشبكه! يعني واضح ان الرجال ماقدر يخرج بأي شيء مفيد الا بهذا الحل البدائي. طلعا هذا الحل جربته ولا اتحلت المشكلة، قال لي برسل مشكلتك للمختصين وراح يتواصلوا معاك عبر الايميل والى الان ماوصلني اي تجاوب.
في المحادثة في اختيار انك تاخذ نسخة من المحادثة كاملة على الايميل واخذت نسخة وجبت لكم صورة من المحادثة وطلبه الغريب بأني احذف يوزري.
صراحة بعد ذاك اليوم اتغيرت نظرتي لEA و راح انتبه لما اكلمهم و ماراح اثق فيهم او في الموظفين تبعهم بعد الان. كنت احسب اني اذا حذفت اليوزر راح يقدر يدخل على يوزري من جهازه ويحل المشكلة لكن اكتشفت ان حذفي لليوزر هو مجرد اجراء محتمل لحل المشكلة لا أكثر ولا أقل. الزبدة من المقالة اني حبيت احذركم واقولكم اذا واجهتوا مشكلة مع اي شركة وخصوصا EA لاتثقوا بكلام الموظف وتتبعوا كل تعليماته.
هل واجهتكم مشاكل مثل كذا؟ شاركونا في التعليقات.
