أحمد قربان
لعبة بروجكت ليجن (Project Legion) اللي اعلنوا عنها استديو سي سي بي (CCP Games) راح تكون نسخة محسنة من لعبة دست 514 (Dust 514)، وراح تكون حصرية للبي سي. استديو سي سي بي اعترف ان لعبة دست على بلايستيشن 3 ما كانت ممتازة. قالوا ان نبغى الجماهير تصبر شوي، وان الالعاب الرهيبة تحتاج وقت طويل لتصميمها.
للمعلومية، لعبة دست هي لعبة تصويب عالم مفتوح، تقدر تقول انها ام ام او (MMO).
قال نائب رئيس استديو سي سي بي، شون ديكر (Sean Decker): “انا اشتغلت مع استديو دايس (DICE) لفترة. اول لعبة تصويب صمموها كان اسمها كودنيم ايقل (Codename Eagle). اللعبة ما في احد يعرفها وما انصح احد يتعرف عليها اصلا، كانت لعبة مفقعة جداً. لكن في النهاية، بعد ما الفريق يضاعف الجهد ويعيد الشغل من نواحي متعددة راح يوصلوا لشي خرافي.”
كمّل شون:” احنا ما راح نغيّر ليجن كثير عن دست. راح نلعب في بعض الامور الاساسية فقط اللي حسينا انها تحتاج تعديل وما كانت ممتازة في دست. صراحة، دست ما كانت بداية ممتازة بالنسبة لنا. احنا راح نهتم بالعالم المفتوح ونخلي اللاعب متصل دائماً مع اللاعبين الآخرين، وهذا الشي اللي ركزنا عليه اكثر شي في دست. اذا الامور ضبطت ومبيعات ليجن كانت قد التوقعات، راح نستمر في تطوير اللعبة اكثر. اما اذا الامور ما ضبطت، راح نشرب شوي *عصير* ونضحك ونقفل الملف هذا ونبدأ بشي مختلف تماماً.”
قال شون بالنسبة اذا اللعبة انتشرت وكانت ممتازة:” اذا بتتكلم عن السنين القادمة، في نظري بعد ثلاثة سنين من الآن، اذا كان موجود عدد كبير من اللاعبين يلعبوا اللعبة ومبسوطين فيها، راح اقول ان احنا ابدعنا وسوينا اللي علينا. اعتقد ان هذا الكلام ينطبق على اي لعبة.”
مثل ما هو مكتوب فوق، الشباب في سي سي بي اكدوا ان ما راح يوقفوا تطوير اللعبة وما عندهم نية انهم يوقفوا. وقالوا خبر محفز للاعبين دست وهو ان كل بياناتهم وشغلهم على لعبة دست راح ينتقل معاهم ليجن.
صراحة ما قيد لعبت اللعبة واول مرة اسمع فيها اصلا. تعرفوها انتوا ولا مثلي؟ (يارب يكونوا زيي وما اكون لحالي). في نظري، الالعاب الجاية راح تكون العاب تصويب عالم مفتوح مثل دستني (Destiny)، خصوصاً مع الامكانيات الهائلة لأجهزة الجيل الجديد. ننتظر ونشوف ليجن كيف حتكون وهل راح تنافس دستني والا لا.
ايش رايك عزيزي القارئ؟ تعرف اللعبة سواء كانت دست او ليجن؟ متحمس لها؟ شاركنا!
Saudi Gamer
أحمد عصام
