محمد الشريف
في آخر يوم في المعرض، حصل لنا نحضر لقاء صحفي مع مخرج لعبة Driveclub، لعبة السيارات الحصرية لجهاز بلاي ستيشن 4.
في البداية استعرض لنا المخرج المزايا الكثيرة المتعلقة بالعناصر الاجتماعية (social) وتركيزهم الكبير عليها، بالاضافة الى تركيزهم على سهولة ووضوح الاستخدام في قوائم اللعبة، بحيث كل شي في اللعبة يكون واضح وسهل لك وبعيد عن التعقيد. فيه برضه تطبيق بينزل على أنظمة آندرويد وiOS بحيث يعطيك معلومات عامة عن السباقات اللي خلصتها وسباقات أخوياك اللي خلصوها ومن أفضل من الثاني، وغيرها من العناصر الاجتماعية.
من الأشياء الرهيبه اللي لاحظناها في اللقاء كانت أصوات السيارات، وفيه عرض ممتاز يعرض لك قد ايش تعمقوا بالأصوات. يقول المخرج انهم ياخذون السيارات وحدة وحدة ويجربونها في المضمار بحيث ياخذون كل شي منها، ويشمل هذا الأصوات والأداء.
من تجربتي للديمو، اللعبة لاحظت انها أركيدية، وأقصد بأركيدية انها لعبة ما تركّز على الواقعية وانها لعبة تبغاك تنبسط وخلاص، من أول سباق لعبته قدرت آخذ المركز الرابع. غير كذا التحكم بالسيارات كان ممتاز وماهو صعب، قدمت أكثر من مرة لكني قدرت أرجع للسباق وبقوة، وهذا شي أحبه في ألعاب السيارات، عكس بعض ألعاب السيارات اللي اذا صدمت فيها انسى انك تفوز بالسباق او تجيب مركز جيد.
الشي الثاني الرهيب ان الضرر اللي يصير في السيارة سواءً من حوادث أو غيره بيكون شكلي فقط، ولا راح يؤثر على أداء السيارة. كل الحوادث اللي بتسويها بتأثر على شكل السيارة فقط، ولا بيكون لها تأثير على الأداء. انسى سالفة ان السيارة تصير تحذف يمين أو يسار، أو ان السيارة تطلع دخان وتصير بطيئة.
الأرهب من هذا كله الرسوم الجميلة للعبة، اهتم مطوّر اللعبة بتفاصيل كثيرة تلفت الاهتمام، وحدة من السباقات اللي عرضوها لنا كانت في الليل، لمن وصل وحدة من اللفات لاحظت ان فحمات السيارات صار لونها أحمر.
برضه في واحد من السباقات انتهى المطر لكنه بقى على الأرض، وانعكس ضوء الشمس على الشاشة بحيث صارت الرؤية صعبة. هذا شي تكلم عنه المخرج وقال انك تقدر تستغل هذا الشي لصالحك اذا لعبت مع أخوياك، بحيث تكون أنت عارف هذا الشي وحافظ الطريق، عكس أخوياك اللي بيتورطون، خصوصاً اذا كانوا يلعبون هالمضمار لأول مرة.
متفائل بدرايف كلوب، احب ألعاب السيارات اللي تقول لك “العب وانبسط” ولا يربطون نفسهم لا بواقعية ولا برسوم خرافية أو بمؤثرات وغيره، ماخذين من كل مكان عنصر معيّن، وهذا شي خلاني أتفاءل باللعبة.
بتنزل درايف كلوب في 8-10-2014 حصرياً على بلاي ستيشن 4.
احمد خالد
Saudi Gamer
