رسمات أعجبتنا من متابعينا الرهيبين

في كل أسبوع نعرض رسمات نختارها من مجتمعنا في جوجل بلس، المجتمع اللي سويناه عشان يجتمعون متابعينا الرهيبين ويناقشون المواضيع الجيمرية مع بعضهم، وبرضه عشان نشوف مواهبهم في الرسم واللعب وغيره.

الأسبوع هذا شفنا رسمات رهيبه، واخترنا لكم بعض منها. اذا أعجبتك الرسمات فبامكانك تشوف كل الرسمات في مجتمعنا.

تذكرون هاللعبة الرهيبه؟ رسمتها لنا ايمي، رهيبه الرسمة خصوصاً النبّيطه (أو النبّيله) نسيت وش اسمها بالفصحى 🙂

من لعبة Jeff The Killer، ما عرفت الشخصية أول ما شفتها واضطريت اسأل دنيا عنها. استغربت من شكله المرعب لكن يوم بحثت عنه عرفت انه مرعب من جد 🙂

سوبر ماريو في لعبة سوبر سماش بروز. مدري ليه الى الآن ماني قادر أتخيل ماريو يضارب 🙂 لكن رهيبه الرسمة من حازم!

بيق بوس من ميتال جير سوليد 3، أعجبني في الرسمة انه جاب “وضعيّة” بيق بوس بشكل صحيح في المشي، والأرهب من هذا كله ان الرسمه من أخوه الصغير!

ننهي رسمات الأسبوع هذا برسمة رائعة من رياض الدوسري، رسامنا الرهيب اللي يشاركنا برسماته بشكل كثير. الشخصية هذي مالها علاقة بألعاب الفيديو حسب علمي، وهي شخصية اسمها Misaka من انمي Another. العادة اننا ناخذ رسمات لها علاقة بألعاب الفيديو لكن هذي المرة تجاوزت عن القوانين بسبب رهابة الرسمة.

شكرًا لكل من شاركنا رسماته، ونعتذر عن اللي ما نشرنا رسماتهم، ما نقدر نكثر المشاركات ولازم نختار 🙁 لكن ثق تماماً ان كل شي تشاركنا فيه في المجتمع راح نشوفه.

ولا تنسى، اذا عندك رسمات رهيبه لها علاقة بألعاب الفيديو شاركنا فيها في مجتمعنا. رسماتك بنحطها هنا في الموقع، وبننشرها لك في شبكاتنا الاجتماعية، وبتطلع في برنامج مشهور الأسبوعي على يوتيوب.

يعطيكم العافية جميعاً.