رسمات رهيبه من متابعينا

رجعنا لكم بمجموعة رسمات رهيبه من مجتمعنا، ولو ان الكل مشغول في العيد ومطاردة الأضحية المسكينة.

هالأسبوع عندنا محتوى ممتاز، وبنعرضه عليكم. لذلك تجهزوا للرسمات الرائعة.

نبدأها برسمة من الطراز الممتاز للموهوب ثامر. رسمة للشخصية المعروفة كراش، واللي الظاهر ثلاث أرباع الجيمرز يبغونه يرجع.

الرسمة الثانية من الرهيب Mr.Specialman واللي رسم لنا رسمة The End من لعبة ميتال جير سوليد 3. رهيب الرسم بالقلم الرصاص، وطريقة الرسم بشكل عام ذكرتني برسمات Ashely Wood، خصوصاً وانه هو اللي مسوي الرسمات الرهيبه اللي شفناها في أجزاء Portable Ops و Peace Walker.

رسمة رائعة من لشخصية Kaz من ميتال جير، شكل الشخصية والكلام المكتوب كله مأخوذ من الجزء الخامس للسلسلة، رهيبه تعابير وجهه. الرسمة من الموهوب NawafGames.

رسمة لأساسنز كريد، يمكن الشي اللي جذب انتباهي -وهو ممكن شي غريب- كيف قدريضبط السهم، حسب ما أشوف من الرسامين انهم غالباً يرسمون الأسلحة بحيث تصير لاصقه في الشخصية نفسها. عموماً، رسمة رائعة من الرهيب عمر ياسين.

ننهي المقالة بوحدة من أفضل الرسمات اللي شفناها هذا الأسبوع، من رسم الفنان ثامر السالمي.

أبدعتوا في رسمات هذا الأسبوع، على ان كثير من المشاركين انشغلوا واحتمال انها ارتباطات العيد.

عموماً، اذا أنت رسام فبامكانك تشاركنا رسماتك الرهيبه في مجتمعنا، ومتابعينا الرهيبين بيشوفونها، بالاضافة الى اننا بننشرها هنا في الموضوع الأسبوعي، وننشرها برضه في برنامج مشهور الأسبوعي على يوتيوب بعد ما ننتهي من بعض التعديلات اللي نسويها.

يعطيكم العافية فردًا فردًا 🙂