أخبار

لعبة Don’t Starve بيجيها تحديث يخليك تلعبها مع أخوياك، أخيراً

dontstarvecoverphoto

أعلن مطوّر لعبة البقاء على قيد الحياة دونت ستارف (Don’t Starve) عن توسعة (توسعة وليس مجرد اضافة) بتسمح للاعبين انهم يلعبون اللعبة مع أكثر من لاعب، بحيث يصير بالامكان أربع أشخاص يلعبون مع بعضهم عشان ينجون في العالم حقها كحد أقصى.

بتنزل الاضافة أولاً على البي سي، وبعدها بتنزل على بلاي ستيشن 4 وبلاي ستيشن فيتا. وبتكون الاضافة ببلاش للناس اللي اشتروا اللعبة على ستيم واللي اشتروا نسخة اللعبة على البي سي (على البي سي لكن ماهو من ستيم)، لكن سعر اللعبة نفسه بيرتفع اذا دخلت الاضافة مراحلها الأولية في التطوير (Alpha). غريبة صح؟ العاد المطوّرين يقولك اياها بشكل واضح: الاضافة بيكون سعرها كذا وكذا، وخلاص.

يقول مطوّر اللعبة انهم كانوا يفكرون بالتوسعة هذي للعبة من البداية، لكن ما كانوا عارفين كيف بيكون تقبّل الناس للعبتهم. بعد ما نزلت اللعبة وباعت، وظّفوا ناس جديدين عندهم واقترحوا عليهم فكرة التوسعة ووافقوا عليها على طول.

توقعت ان اللعبة انتهت للأبد بعد تجربتي لها، لدرجة اني مسحتها من جهازي. بأرجع أحملها اذا نزلت هالتوسعة، وبأجرب ألعبها مع أخوياي. أحسها بتكون رهيبه.

وش رأيك بالتوسعة حقت اللعبة؟

الوسوم
اظهر المزيد

محمد الشريف

كاتب ومدير تحرير موقع سعودي جيمر. أعشق ألعاب الفيديو من يومي صغير (ايه كلنا كذا)، أحب ألعاب التخفّي والرعب، وأعشق سلسلة Metal Gear ولعبة Silent Hill وICO.
إغلاق