محمد الشريف
اليوم، شفنا عرض لعب مطوّل للعبة ديستيني اللي الكثير يسأل عنها، خصوصاً ان اللعبة هذي بالذات اتجهت اتجاه مختلف عن باقي الالعاب. لعبة تعاونية بيتم دعمها لعشر سنوات، وبتنزل على كل الأجهزة، واللي بيسويها مطوّر سلسلة Halo المعروفة! جبنا لكم اليوم معلومات كثيرة عنها!
من أول الأشياء اللي ذكروها لنا في اللقاء كانت تكوين العالم والتحدي اللي واجهوه وهم يسوون اللعبة. بنسوي لعبة ضخمة وكبيرة للاعب يسرح ويمرح فيها على كيفه، لكن كيف نبي نقنع اللاعب انه يختار لعبتنا بين مئات الألعاب الموجودة؟ والأهم من كذا، كيف نحافظ على اللاعب ولا نخليه يترك لعبتنا؟ سؤال في مكانه.
اللعبة بشكل أساسي هي أونلاين آكشن آر بي جي (Action RPG) مع بعض خصائص MMO (ألعاب أونلاين تحمل عدد كبير من اللاعبين). لعبت Borderlands؟ ايه، مثلها بالتمام. فيه اختلافات كثيرة بينهم لكن الأساس نفسه. وفي كل فيديو يعرضونه للناس، يورونك كيف ان اللعبة تعاونية تلعبها مع أخوياك وتخلصون مهمات وتقضون وقتكم مع بعض.
انبسطت جداً وأنا أشوف استعراض الخصائص اللي في اللعبة، صحيح مافيها شي جديد، لكن العناصر اللي اختاروها وجمعوها في لعبة وحدة كانت مثيرة للاهتمام من جد.
في بداية الديمو، واللي تقع أحداثه في روسيا القديمة، استعرضوا لنا طريقة انجاز المهمات مع صاحبك. ما تختلف كثير عن باقي الألعاب، تبدأ المهمة أنت وصاحبك وتدخلون جوا مكان مظلم. تتعمقون شوي في المكان وتبدأون تواجهون الأعداء، وفي نهاية المطاف، ومثل أي لعبة ثانية، تواجهون الزعيم وتحاربونه الين يموت.
أجواء اللعبة ساحرة، وأقول ساحرة لأن هذا النوع من البيئات يعجبني. أحداث اللعبة راح تكون مستقبلية، بعد انهيار التطوّر البشري وانتهاءه. العالم صار مهجور والطبيعة رجعت تاخذ كل الأماكن اللي صادروها منها البشر، وتقدر تشوف هذا في الأشجار اللي تنبت في المصانع والبيوت والعماير، والحيوانات اللي صارت تعيش فيها، وغيرها من الأماكن اللي من صنع البشر.
من أكثر الأشياء اللي جذبت انتباهي كانت الأسلحة. تركيز كبير جداً على الأسلحة، تماماً مثل Borderlands. طريقة تطوير الأسلحة معروفة للاعبي الآر بي جي، وهي تنفيذك للمهمات وانجازها يعطيك نقاط، تصرف النقاط هذي على تطوير شخصيتك والأسلحة اللي معك. فيه طبعاً تطويرات مثل اضافة Element على سلاحك، بحيث تخليه يطلق طلقات نارية أو ثلجية وغيره من عناصر الآر بي جي المعروفة.
من أهم النقاط اللي ركزوا عليها Bungie كانت انهم يبغون اللاعب يعيش اللعبة مع أخوياه، تلعب اللعبة مع واحد من أخوياك وتعيشون في هالعالم الواسع وتمرّون بالتجربة الجميلة مع بعض. برضو من الأشياء المهمة اللي ذكروها ان الأحداث في اللعبة راح تكون “ديناميكية”، ومعنى هذا ان الأحداث اللي بتشوفها في اللعبة ماهي بالضرورة مخطّطة مسبقاً. تذكرون الناس اللي كانوا فجأة يطلعون لك في نص الطريق يطلبون منك المساعدة في Red Dead Redemption؟ شي زي كذا، هذا المقصود بالأحداث الديناميكية.
في نهاية الديمو اللي تفرجنا عليه، بعد ما نفذوا المهمة وقضوا على الزعيم، طلعوا برا المكان اللي دخلوه. أول ما طلعوا الا وجابوا طيارات كبيرة تدخل وتنزل جنود كثيرين، وبعدها نزل عدد كبير من الأعداء معه عدو كبير ورا. بدأو الجنود يحاربون الأعداء وطلع على الشاشة مكتوب Joined public event، ويعني هذا انك دخلت تلقائياً حدث أونلاين مشترك مع لاعبين ثانيين مثلك، طبوا كلهم على الأعداء المساكين وذبحوهم كلهم. أعجبني طريقة الخلط ما بين المهمات التعاونية الثنائية والجماعية.
لعبة ديستيني بتنزل على PS3, PS4, Xbox 360, Xbox One في 2014. اللعبة واضح انها مغامرة كبيرة لا تخلو من الشجاعة من طرف Bungie. ايش الأشياء اللي تحتاجها اللعبة عشان تعجبك، وتخليك ترجع تلعبها بشكل متواصل؟ شاركنا برأيك في التعليقات!
فيديو اللعبة
بارعة
احمد خالد
أيمن اليغشي
