أحمد قربان
احد المواقع وصلته اخبار ان ستديو داي بريك (Daybreak) تخلّى عن بعض الموظفين اللي فيه. الاستديو صمم لعبتي ايفير كويست (EverQuest) و اتش 1 زد 1 (H1Z1)، من ضمن الموظفين اللي الاستديو اتخلى عنهم هو ديفيد جيورقسين (David Georegson)، هذا الشخص هو اللي كان مسؤول عن لعبة ايفير كويست لسنين طويلة.
مانعرف بالضبط عدد الموظفين اللي مشوهم من استديو داي بريك. وفريق العمل الى الان بتجيهم معلومات انهم مو أكيد راح يبقوا موظفين للاستديو. استديو داي بريك كان اسمه سوني اونلاين انتيرتيمينت (Sony Online Entertainment) تقريبا لمدة عقدين من السنين -يعني قريب 20 سنة-، الان الاستديو منفصل وغير اسمه الاسبوع الماضي بعد ما سوني باعت الاستديو لاحد الشركات الادارية في مدينة نيو يورك. على الرغم من ان الاستديو كان فرحان ويبتسم من الاتفاقية للناس الا ان الموظفين مباشرة جاهم خبر ان بعضهم راح يتم التخلّي عنهم عشان تقدر تربح الشركة. هذا الكلام قاله شخص مقرب من الاستديو.
قال هذا الشخص المقرب: “معظم الشركات الادارية تحاول دفع الموظفين للاتجاه الجديد و تحفيزهم له، لكن مافي احد من طاقم العمل متأكد اذا كان هو من ضمن خطة الاتجاه الجديد او لا.” اللي قال الكلام ذا طلب انه يكون مجهول بسبب ان الكلام ذا غير مسموح لاحد يقوله خلال المؤتمر الصحفي.
بعد فترة من الوقت رد الاستديو على هذا الكلام وقال: “جزء من قراراتنا الاستراتيجية لتحسين التجارة في السوق. شركة داي بريك للالعاب اعلنت اليوم انها راح تتخلّى عن بعض المناصب في ستديوهات مدينة سان دييقو و مدينة اوستين. هذي التغييرات هي لمصلحة الاستديو الجديد عشان يربح ويتطور في المستقبل. بالاضافة للهدف الرئيسي للشركة وهو صناعة العاب اونلاين من الدرجة الاولى و بناء اساس قوي وناجح للالعاب على كل الاجهزة في المستقبل. هذي التغييرات ماراح تأثر على اداء الالعاب الحالية والشركة راح تستمر في مهمتها في تكوين شراكة مع مجتمع اللاعبين وقيادة المستقبل معهم بالاضافة لدفع العاب الاونلاين لاقصى الحدود.”
تقدروا تشوفوا خبر بيع سوني للاستديو بالتفصيل.
هل تشوفوا ان ذا الشي بيأثر على العاب الاستديو؟
احمد خالد
أحمد عصام
