في أول مقابلة مع مخرج لعبة دارك سولز 3، السيد Hidetaka Myiazaki، الشخص الغريب اللي يزيد حب اللاعبين له مع زيادة تعذيبه وعقابه لهم في ألعابه، صرّح ان كل شي في دارك سولز 3 تم تصميمه ووضعه بحيث يقتل اللاعب.
“تصميم المراحل، وأماكن وضع الأعداء، كل شي تم وضعه بحيث يقتلك. لكنك تقدر تستخدم كل هالأشياء لصالحك”.
هذي كانت أول وأبرز الجمل اللي قالها ميازاكي في المقابلة. قالها وهو يضحك، وكأنه يرسل رسالة للاعبين اللي يتساءلون عن الجزء القادم للسلسلة.
اذا جاك كلام ان دارك سولز 3 بيتم تغييرها بشكل كبير، وانها احتمال تصير مثل بلودبورن بحيث تكون مبسّطة أكثر، فاحتمال ان الكلام هذا غلط. يقول ميازاكي:
“عناصر طريقة اللعب الأساسية، شعور الإنجاز اللي تحس فيه بعد ما تتجاوز مكان أو مرحلة صعبة، وميزات الأونلاين اللي تسمح للاعبين انهم يتواصلون مع بعضهم بطريقة غامضة وغير مباشرة، كلها موجودة في اللعبة. لكننا تعمقنا في العناصر الأساسية هذي”.
في دارك سولز، اللعبة كانت أعمق من بلودبورن من نواحي كثيرة، بعض اللاعبين ممكن يسمي هذا الشي “تعقيد”، وان بلودبورن قدرت تبسّط عناصر كثيرة في دارك سولز. هذا التبسيط احتمال ما نشوفه في دارك سولز 3:
“ناوين نتعمق في الميزات الموجودة في كل سلاح عشان تعطي اللاعب خيارات تكتيكية أكثر”.
قبل يعرضون نسخة تجريبية (نسخة أولية ما قبل مرحلة Alpha)، اعتذر ميازاكي وقال ان اللي بيلعب قدامهم في المقابلة احتمال يموت من باب الصدفة (يمكن يقصد ان اللعبة لا زالت فيها مشاكل تقنية)، لكن اللي شافوه أصحاب المقابلة ان اللاعب اللي يلعب قدامهم ما مات من باب الصدفة، ولكنه مات بسبب الأعداء اللي “قطّعوه تقطيع” بسبب الأخطاء البسيطة اللي ارتكبها أثناء لعبه، مثل التوقيت الخاطئ للضربات أو التفادي الخاطئ وغيرها.
” فيه الكثير من المواقف الصعبة اللي بيواجهها اللاعب، ولكن في نفس الوقت بنوفر له حلول منطقية مثل نظام حركة أسرع من المعتاد”.
هذي جميع التصريحات اللي طلعت من ميازاكي في المقابلة. وش رأيكم؟
