الشيخ دايجو يوميهارا (Daigo Umehara) لاعب ستريت فايتر العالمي، من أفضل وأشهر لاعبين ستريت فايتر واللي يشاركون في بطولاتها، كثير يقول انه الأفضل على الاطلاق.
اذا طرا على بالي أحد هالأشخاص اللي يشاركون في هالبطولات واللي يلعبون بهذا الشكل المجنون، يتشكّل في بالي ولد مراهق شعره منكوش ما عنده الا شي واحد يسويه في حياته: جالس قدام الكمبيوتر يلعب ستريت فايتر طول اليوم، وعيونه حمرا من كثر اللعب والادمان.
طلعت تخيّلاتي غلط -كالعادة-، طلع الولد مثلنا عنده بيت، وعنده غرفة خاصة فيه، فيه غرفة طعام والولد لابس ملابس مرتّبة. لكن الأغرب من هذا كله: ما عنده جهاز ألعاب في البيت!
قبل فترة بسيطة، قناة يابانية زارت الشاب اللطيف في بيته عشان يعرضون له حلقة كاملة عن الشاب، كيف روتينه اليومي وكيف وصل الى هذا المستوى وغيرها من الأسئلة اللي ممكن تثير اهتمام متابعينه.
هذي صورة لدايجو في بيتهم، تقدر تشوف ان الولد مثل باقي الأوادم، يجلس مثلنا ويستخدم الجوال وحوله شنطة يبدو انه يستخدمها عشان يروح فيها مدرسة او جامعة، وفيه برضو صورة واحد تحت على اليمين شكله يصلح يصير meme، لكن ما علينا منه.
سألت القناة اليابانية دايجو: “ليش ما عندك جهاز ألعاب في البيت؟”
رد دايجو: “لان لو عندي جهاز ألعاب راح أصير ألعب طول الوقت، وهذا شي غير صحي”
أما بالنسبة للعب، فيقول دايجو ان عنده شقّة خاصة للألعاب، يحط فيها كل الأجهزة والأشياء اللي لها علاقة بألعاب الفيديو. بعد ما يخلص من النادي، يروح دايجو لهذي الشقّة ويبدأ يلعب من الساعة 6 مساءً الى منتصف الليل، بعدها يطلع منها ويلحق على آخر قطار موجود عشان يرجعه البيت.
يبدو ان دايجو عرف يعالج ادمان نفسه بنفسه، يعرف انه لو جلس لفترة أطول بيروح عليه القطار وبيضطر “يسكسكها رجليّه” على قولة أهل الرياض.
هل قدرت تعالج ادمانك للألعاب؟ اذا تعرف، يا ليت تساعدنا!
