محمد الشريف
لعبة باسم Crowfall، فتحت مشروع دعمها على موقع دعم المشاريع المعروف كيك ستارتر (kickstarter) وطلبت 800،000 دولار كمبلغ للعمل على المشروع. وصلوا المبلغ اللي يبغوه في ظرف ثلاث أيام فقط لا أكثر.
في حال ما كنت تعرف كيك ستارتر، هو موقع يجون فيه أصحاب المشاريع اللي ما يملكون قيمة المشروع حقهم، ويعرضونه على الناس هناك. اللي يعجبه المشروع يقدر يدعمه بمبالغ معينة تختلف عن بعضها، حسب حماس الشخص للمشروع. الموقع يعطي أصحاب المشروع 30 يوم الين يوصلون الهدف المالي اللي يبغونه، اذا جابوه بدأوا المشروع، واذا ما قدروا فغالباً يتم الغاء المشروع أو يشوفون له حل.
لعبة كراوفول، لعبة بي سي من تطوير مجموعة مطوّرين قدّموا ألعاب مثل Ultima Online و Star Wars Galaxy و Star Wars: The Old Republic.
ستديو التطوير، واللي اسمه Artcraft، يصف اللعبة بأنها لعبة MMO (لعبة أونلاين يلعبها عدد كبير من اللاعبين) يلعبون فيها اللاعبين بأدوار كثيرة، مثل ملك أو ملكة أو مرتزقة وحشاشين (أو أساسينز) في العصور الوسطى الأوروبية (عوالم قديمة مثل ألعاب الآر بي جي ذا ويتشر وبعض أجزاء فاينال فانتسي). بيتحاربون اللاعبين ضد بعضهم ويبدأون يبنون مدنهم الخاصة فيهم.
الأسامي اللي تشتغل على هالمشروع كبيرة ولها باع طويل في هذا المجال، وهذا واحد من أهم أسباب دعم الناس لها.
أما بالنسبة لموقف أصحاب المشروع، فقالوا:
” حنا نشعر بالتواضع تجاه اللي شفناه من اللي دعمونا. كان هدفنا وطموحنا اننا نعرض فكرة عن اللعبة للناس لعلّها تلقى لها جمهور، لكن ما توقعنا ان المشروع يتجاوز الهدف حقه بهذي السرعة الكبيرة”.
اللعبة لا زالت موجودة في موقع كيك ستارتر، على الرغم انها وصلت هدفها خلاص. بامكانك تلحق وتدعم اللعبة في حال كنت مهتم باللعبة وبالنسخ الخاصة اللي ناوين يبيعونها للداعمين.
وش توقعاتكم للمشروع؟
أيمن اليغشي
بارعة
ابراهيم سليمان