مشهور الدبيان
مع التوسّع والتطوّر السريع اللي جالس يصير في مواقع العاب الفيديو العربية (هالسنه تحديداً) شفنا عدة أفكار تتطبّق في أكثر من موقع. يعني نفس الفكرة تلقاها في أكثر من مكان. بس مين جالس يسرق أفكار الغير؟ ومين اللي جالس يبدع ويبتكر والباقين يتبعونه؟
طبعاً ممكن تكون شايف مؤخراً الفيديو حق التعريب وتعتقد اني كاتب هذا الموضوع عشان ازبّد واقول فلان سرق فكرة فلان أو ليش فلان يسرق فكرة فلان، لكن فعلياً كتبت هالموضوع لسبب مختلف تماماً. كتبت هالموضوع لانه صراحه “حامت كبدي” من اللي يطلعون كل فتره ويتهمون احد المواقع انه سارق فكره احد ثاني، سواءاً من متابعين هالمواقع أو من بعض أصحاب المواقع انفسهم.
خلونا نكون صريحين: لو بنعتبر تنفيذ فكرة أحد ثاني هي “سرقة”، فبتطلع كل مواقع العاب الفيديو السعوديه “مسروقه”. أجزم ان اصحاب المواقع جميعاً (ومنهم أنا) ما بدو مواقعهم الا لأن فيه موقع اجنبي (غربي) متخصص في العاب الفيديو أعجبهم وحبوا يمارسون هوايتهم ويدعمونها في المنطقة عن طريق انهم يسوون مواقع مماثلة.
مافيه احد فينا مخترع شي جديد .. ولا أحد. كل فكره مطبّقه في كل موقع غالباً اما “منقوله” زي ماهي من موقع ثاني (غربي أو عربي) أو ان صاحب الموقع طوّر فكره موجودة أساساً أو خلط أكثر من فكرة مع بعض، سواءاً كانت هالافكار من داخل مجال الالعاب أو خارجه.. بس الغريب ان التدقيق في تطبيق الأفكار ما يصير الا اذا موقع عربي اخذ فكره (أو طوّر فكرة) من موقع عربي ثاني، ووقتها يصير شي عيب ويضحك وكيف يصير كذا أصلاً. بس اذا بتاخذ من مواقع عالميه فبالعكس شد حيلك والله يقويك!
يعني عادي جداً تلقى موقع يقلّد موقع Gamespot الامريكي في شيء معيّن، بس اذا جا موقع عربي ثاني سوا نفس الشي بتشوف صاحب الموقع ذاك يقول “فلان سرق فكرتي!!”. اذا بنسميها “سرقة”، فانت توك تسارق هالفكرة من موقع اجنبي، تجي تلوم هالموقع العربي يسرقها منك ليش؟ لانه عربي بس؟
أيضاً من السذاجة صراحة ان الشخص يعتقد ان المواقع المتخصصه في مجال معيّن بتصير كلها مختلفة عن بعضها لدرجة ان مافيه ولا فكرة تشبه الثانيه فيهم. لابد يجي وقت هالافكار تتقاطع وتتشابه، ولابد موقع يسبق الثاني على فكرة معينه، مستحيل كلهم يطبقون نفس الافكار في نفس الوقت لان تفكيرهم وترتيبهم لأولوياتهم تختلف!
أيضاً الأسبقيه ماهي كل شي. مجرّد ان موقع “أ” طبّق الفكرة قبل موقع “ب”، لا يعني ان موقع “أ” هو الأفضل. الزبدة كلها في التنفيذ – مين اللي بينفّذ هالفكره احسن؟ نوكيا جلست سنوات طويله مسيطره على سوق الجوال قبل ما تجي آبل وتغير فكرة اجهزة الجوال تماماً. هل الشركات الثانيه وقفت او حاولت تسوي شي مختلف 100% عشان تخاف انها تصير “قلّوده”؟ لا طبعاً، راحت طوّرت على نفس الأساس اللي بنته آبل (شاشات لمس، متجر تطبيقات…الخ) وتفوقت عليها ببعض النواحي. وآبل نفسها أساساً بنت جوالها الآيفون على أفكار كثيرة من الجوالات اللي كانت موجودة أساساً وقتها. كل واحد جالس يطوّر أفكار اللي قبله.
وبالمناسبة في بعض الحالات تلقى البعض ما يبي الاسبقيه عن قصد (سواءاً على مستوى مواقعنا أو حتى على مستوى الشركات). ليش؟ عشان يبي غيره يثبت نجاحها أول، وما يتوهّق هو في حال فشلت. خاصة اذا كان تنفيذ الفكرة يتطلّب فلوس. مع اني اختلف شخصياً مع هذا الاسلوب في كثير من الاحيان الا انه موجود ومنطقي.
المشكلة الحقيقية هي التقليد الأعمى
الاستفادة من افكار الناس ماهي مشكلة، المشكلة الحقيقية هي التقليد الأعمى. كيف؟ بعض المواقع (واتكلم بشكل عام مو بس بمجال العاب الفيديو) تلقى شغلته في الحياه يتفرج على غيره ويطبّق كل افكارهم الناجحه، ويطلع بالأخير موقع مرقّع ومشتّت ما تدري وش يبي ولا عنده توجّه واضح.
يصير كانه واحد يروح السوق يبي يشتري ملابس بس يشتري كل قطعة ملابس بشكل مستقل بدون أي اعتبار لأشكال وألوان قطع الملابس الثانيه اللي بيشتريها، فتلقاه لابس التي-شيرت الاحمر اللي اعجبه على فلان، والبنطلون الاخضر اللي اعجبه على فلان، والجزمة (تكرم) البرتقاليه اللي اعجبته على فلان.
يطلع في النهايه شكله نكته قدام الكل، بس هو يحسب نفسه رهيب لانه اشتري احسن شي من كل شي، بدون ما يهتم بتناسقهم مع بعض، وبدون ما يهتم بانه يشتري اللبس اللي يناسب شخصيته، ويضر بنفسه أكثر من غيره.
مو أي فكرة حلوه تشوفها تصلح لموقعك (مهما كانت هالفكرة ناجحة). الكومنتري مثلاً منتشر بشكل كبير عندنا في السعودية، ولكن مع ذلك ما نفكّر نسوي كومنتري في قناتنا على اليوتيوب، مو عشاننا نكره الكومنتري او ما نقدر نسويه، بس لأنه لنا توجّه معيّن على اليوتيوب والكومنتري ما يناسب هالتوجّة، وبالتالي مهما كانت شعبيته مضطرين اننا ما نسويه، باسثناء كم فيديو كومنتري سويناه سابقاً لان كان فيهم جانب ابداعي متماشي مع توجّه القناة.
موقعنا من بدايته بنيناه على أفكار جبناها من مواقع غربيه بشكل مباشر أو غير مباشر، وأفكار ارسلوها لنا المتابعين، وأفكار استفدنا منها برضه من مواقع عربيه سواء بشكل مباشر أو غير مباشر، وحتى أفكار استفدنا منها من مجالات ثانية، وهالشي ما اعتقد راح يوقّف لان لو اي احد بيتفلسف ويسوي نفسه عبقري وما ينفّذ الا فكره مخترعها هو 100% فما راح يتطوّر ابد.
بنشوف أفكار تعجبنا في كل مكان. اذا كانت مناسبه لنا ولمتابعينها ولتوجه الموقع بشكل عام فبكل تأكيد راح نستفيد منها بشكل أو بآخر. بنحاول قدر الامكان نطوّر الافكار اللي تعجبنا عشان ننفذّها بشكل أفضل، وبنفس الوقت بنحاول نقدّم أشياء تختلف (قدر الامكان) عن اللي تشوفونها في المواقع الثانية، مو تقليلاً من قدرهم أو قيمة أعمالهم، لكن مواقع العاب الفيديو الكبيره في السعودية جداً قليلة، واذا كلنا بنقدم نفس الشي فالخاسر الأكبر بيكون المتابع اللي يحتاج للتنويع.
وانت ايها القاريء الرهيب اللي كمل المقاله لنهايتها، وش رأيك بسالفة التقليد هذي؟ شاركنا برأيك في التعليقات.
احمد خالد
أيمن اليغشي
