أعلنا أمس عن الفايز في مسابقة الرسم. مثل ما قلنا، الرسمات الرهيبه كثيرة لدرجة اننا ما نقدر نتغاضى عنها ونخليها تروح، فسوينا هالموضوع عشان نعرض لكم أجمل الرسمات اللي شفناها.
كل الصور حطيت معها رابطها، في حال كنت تبغى تشوف الصورة بحجمها الكامل. اضغط على الرابط اللي مع اسم الشخص وبعدها اختر more وبعدها download.
خلود رسمت لنا Lightning من فاينال فانتسي 13. عادةً أفضّل الرسم العادي على الرسم الرقمي، لكن هذي من الرسمات الرقمية النادرة اللي تعجبني اعجاب كبير.
رؤى رسمت لنا شخصيتها في لعبة فاينال فانتسي 14. شي رهيب انك تكوّن شخصية في لعبة، وتقدر ترسمها بشكل ممتاز.
كليمنتاين من لعبة The Walking Dead من الأخت سارا. أعجبني في الرسمة انها كأنها لوحة فنية، تقدر تطبعها وتعلقها.
من الأخ تركي الهاجري. هذي كانت من أقوى المرشحين للجائزة، مستوى الاتقان فيها خرافي لدرجة صعب الكلام يوفي حقها.
من رسم الأخ عبدالعزيز حكمي. اللعبة رسمها فنّي وجميل، والرسم الفنّي هذا ما يقل جمال عن رسم اللعبة.
من رسم الرهيب عدي. الشخصية المعروفة جول من لعبة The Last of Us.
من رسم الرهيب محسن. كانت من أقوى المرشحين بالفوز. فكرتها خرافيه بالاضافة الى ان مستوى الاتقان فيها استثنائي.
من رسمة الرهيب dzoy. شخصية Big Boss من سلسلة ميتال جير. أسلوب الرسم ممتاز، خصوصاً اختيار الألوان هو الأفضل.
رسمة للشخصية المعروفة كراش من الأخ فهد. نظرات كراش قاتلة 🙂
رسمة للعبة Journey. اللعبة تميّزت بجمال الرسومات فيها، ومانعتقد ان الرسمة هذي تقل جمال عن رسومات اللعبة. الرسمة من الرهيب بدر.
رسمة الرهيبه ايمي لشخصية Vaan من فاينال فانتسي 12. من أكثر الرسمات اللي أتقنت ملامح الوجه.
رسمة من الرهيبه عائشة علي. الشخصية هي أفالين من أساسنز كريد. من الصور اللي أعجبتني جدًا.
ولا تنسى، فتحنا أمس قسم خاص للرسمات اللي لها علاقة بالفيديو جيمز. اذا عندك رسمات رهيبه اعرضها عندنا في المجتمع، واذا كانت رهيبه فراح ناخذها وننشرها لك في شبكاتنا الاجتماعية عشان يشوفونها متابعين سعودي جيمر في كل مكان!
