Gamescom 2013أحداثمقابلاتمقالات

مقابلة مع أحد المسؤولين عن تطوير Call of Duty: Ghosts

codraven

في معرض جيمزكوم كان عندنا مقابلة مع “ايريك بيسمان” المخرج الابداعي (creative director) للعبة Call of Duty: Ghosts القادمة.

دخلت جناح Activision وانتظرت دوري في المقابلة. استغليت هالوقت في اني اسولف مع جميل عن الاسئلة اللي المفروض نسألها، ومن ثم سألت الناس عالسريع في تويتر عن الأشياء اللي يبون يعرفونها ولقطت لي كم سؤال. ثم تركني جميل على اساس يحضر احد مواعيده السريعه في المعرض، وجلست مع محمد الشريف ننتظر دورنا الى ما نادتنا اللي تنسّق المقابلات.

عرفتنا على إيريك، انسان بسيط وبشوش صافحنا وهو مبتسم. تحسه حبيب وعلى نياته مره، واعتقد هذا اللي خلا الشركة ما تخليه يتكلم معنا عن اللعبة الا بوجود مسؤولة العلاقات العامة. شكلهم خايفين يجيب العيد! ومن هنا بدأنا المقابلة

أوكي خلني في البداية أقول لك اني ما أحب كول أوف دوتي. هي لعبة ممتازة، لكني ما أعتبر نفسي من عشاقها ..

بنخليك تصير من عشاقها *يضحك*

كنت بقول أنه عشّاق السلسلة بيلاحظون أي تغيير صغير ممكن تسوونه في السلسلة، بس شخص مثلي ما يشوف الفرق. فهل فيه شي سويتوه في اللعبه بتخليها تجذب الغير مهتمين للسلسلة؟

هل لعبت أي العاب سابقة من كول أوف دوتي؟

وقفت عند مودرن وورفير 3، ولعبت بلاك أوبس 2 شوي..

اللعبة بتكون فيها قصة جديدة كلياً مع كتيبة جديدة وعالم جديد كلياً، وهالشي بيكون رهيب بالنسبة لناس كثيرين، لاني اعتقد انه بعض الناس يجون لأحد اجزاء كول أوف دوتي الأخيرة وما يدرون وش صار قبلها. وبالاضافة لطور القصة فيه طور الأونلاين. نبي نخافظ على نفس طريقة اللعب الأساسية…

*قاطعته* اذكر لي شي ممكن يبهرني مثلاً ويخليني اقول “واو ابي ارجع العب هاللعبة”

ما نقدر نرمي الأشياء الأساسية في اللعبة، بس فيه عدة أشياء جديدة أضفناها فوقها. الشركة كانت مهتمة جداً بالتخصيص (customization)، بحيث يقوّون ارتباط اللاعبين باللعبة وبجنودهم، وهذا اعتقد أول شي بتلاحظه اذا دخلت طور الأونلاين، وهو انك فجأه صار عندك شخصيه تقدر تعدل عليها بشكل كامل. يعني بتلقى عناصر كثيرة جداً لتغيير رأس وجسم جنديك وغيرها..

بيكون عندك تحكّم كامل في الشكل؟

ايه بتغيّر شكل جنديّك براحتك، تبي هذا الراس مع هذي الخوذه مع اللي هو، انت تختار اللي تبيه. بس بيكون شي شكلي فقط. فيه تطوّرات بعد من ناحية اللعب. وحدة من الأشياء الكبيرة في بلاك أوبس 2 كانت نظام “اختر عشرة” (pick ten) اللي يتيح للاعبين يختارون معداتهم بالشكل اللي يناسبهم نظام لعبهم. والشركة الآن حابه تتوسّع في هالنظام بشكل أكبر بحيث تخليك تقدر تضبّط لاعب يناسب أسلوب لعبك سواءاً كنت تركض وتطلق أو تتخفى.

هالشي نفذوه عن طريق انهم اعطوك سلاح أساسي، سلاح ثانوي، واثنين من المعدات (وحده قاتله ووحده غير قاتله)، وبالاضافة الى ذلك عندك نظام البيرك (perk). الآن عندنا 8 خانات للبيركات، وكل بيرك بيكلّفك نقاط معيّنة. فتصير تختار البيركات اللي تناسب أسلوب لعبك. بالاضافة الى انه اذا ما تبي سلاحك الثانوي، فتقدر تتخلّص منه وتستخدم بيرك بداله. فصار نظام تقدر تعدّل وتبدّل فيه زي ما تبي، وبالتالي يصير فيه ارتباط أكبر مع لاعبك ومع العالم اللي تلعب فيه.

هالشي يقودني لسؤال ثاني وهو بخصوص الشخصيات النسائية، هل بيكون لهم ملابس فيها لمسة انثوية؟ أكيد البنات يبون يخلون شخصياتهم كيوت شوي

*يضحك* هذي لعبة قتالية، ففي النهاية هم جنود. وفيه ناس سألوا اذا كان فيه فرق بين اللعب بالرجال والنساء بس مافيه فرق، الاختلاف شكلي فقط.

codfemale

يعني كل الملابس والاغراض المتوفره لشخصية البنت بتكون نفس اللي متوفره للرجال؟

ايه، بس طبعاً شكلها مختلف بحيث تناسب شكل الشخصية. وبالمناسبة أبعاد الشخصية النسائية نفس الرجالية، ما راح يختلفون في الطول أو شي زي كذا.

(وهنا جا جميل وجلس معنا وسأل) طيب وأصواتهم كيف؟

أيه عندهم أصواتهم النسائية الخاصة

لا بتكون أصواتهم أصوات رجال ..

*يضحك* ان شاءالله انك تعرف هالشخص (يقصد جميل)

ايه معنا في الفريق. عموماً، وحده من الأشياء اللي ما تعجبني شخصياً في السلسلة هو عدم التوازن اللي يسببه نظام الكيل ستريك، فهل سويتوا أي شي بخصوص هالموضوع؟

في هالجزء رجعنا للسترايك باكج، وفيه ثلاث انواع منهم: هجومي (Assault)، و دعم (Support)، ومتخصص (Specialist).

وحده من الأشياء اللي تعلمناها من مودرن وورفير 3 هي ان هي بيركس الدعم كانت قوية بزيادة. مثلاً فيه ناس كثير اشتكوا من الـSealth Bomber لأنه كان يساء استخدامها بشكل كبير. اما الآن بتصير تستخدم هذا النوع من السترايك باكج لدعم فريقك فقط، والمميّز فيه انه النقاط اللي تجيك من القتلات ما تروح بمجرد ما تموت، عكس السترايك باكج الهجومي.

فحتى لو كنت زلابه وأموت كثير، فبكون قادر على الأقل اني اجمع لي كم قتلة واستخدم السترايك باكجز حقتي بحيث ادعم فريقي، صح؟

ايه طبعاً. شخصياً انا سيء في اللعبة، وعشان كذا دايم استخدم نوع “الدعم”، لانه هذي هي الطريقة الوحيدة اللي تحسسني بالرضى عن نفسي *يضحك*. وبالمناسبة شلنا الديث ستيرك بعد لأن كثير ناس اشتكوا منه.

وفيه الأخير اللي هو المتخصّص، بس ما نقدر نتكلم عن تفاصيله حالياً.

كثيرين اشتكوا من موضوع الهاكات خلال اللعب، فهل سويتوا أي شي للحد من هذا الموضوع؟

للأسف ما عندي التفاصيل عن هالموضوع، فبضطر اني ما اجاوب على هذا السؤال.

هل بيكون فيه شي موازي للنيوك أو المواب في قوستس؟

لسه ما اعلنا عن التفاصيل بهالخصوص الى الآن.

بخصوص الدمار اللي يصير في المراحل، هل تقدر تسوي دمار كبير ولا بس أماكن معيّنة هي اللي تتدمّر وتتكسّر؟

وحدة من الأشياء اللي نحبها في كول أوف دوتي هو انك تقدر تعرف الخريطة زين وتستفيد من هالشي تكتيكياً خلال اللعب، فما كان ودنا نخلي اللاعبين يقدرون يدمرون كل شي في الخريطة، بس حبينا نعطي اللاعبين الخيار انهم يدمرون بعض الاماكن بحيث تخدمهم خلال المعركة.

يعني كل مره تلعب بتصير تفجّر نفس الاشياء وتتفجّر بنفس الطريقة؟

ايه.

ابي أسألك عن طور السكواد (squad mode) الجديد: شخصياً استمتع بقتل اخوياي والناس عموماً، في الألعاب بس طبعاً! فاذا كنت ألعب ضد السكواد المنافس اللي يتحكّم فيهم الكمبيوتر، فما راح تكون فيه نفس درجة المنافسة..

طورنا الذكاء الصناعي بحيث يكون قريب جداً من طريقة تصرّف البشر وهالشي بتلاحظه خلال لعبك

codsquad

بس اذا قتلت أقراد سكواد خويي جميل مثلاً، فما راح يخسر أي شي صح؟ ابي بس أعرف اذا اقدر اهينه من خلال سكواده (علّق علي جميل: هذي هي الطريقه الوحيدة اللي يقدر يفوز علي فيها)

*يضحك* بس طور السكواد أكبر من كذا. تقدر تلعب لحالك، تقدر تلعب مع خويك بنفس الفريق، أو سكوادك ضد سكواد خويك، تقدر تاخذ سكوادك وتلعب ضد سكواده، ومب شرط حتى يكون موجود هو

أوه لحظه، يعني أقدر ألعب ضد السكواد حقه حتى لو هو مب أونلاين؟

ايه. واذا السكواد حقه كان ممتاز، بيكسب اكس بي منهم. بالاضافة الى ذلك فيه طور تعاوني اربع لاعبين ضد أمواج من الأعداء، يشبه طور السرفايفل في مودرن وورفير مع بعض التعديلات.

طيب راح أقدر اطور السكواد حقي؟

بتقدر تفك وتسوي الى 10 جنود في السكواد حقك، والشي اللي تطوّره فيهم هو انك تعطيهم الاسلحة والأدوات اللي تفكها. فعلياً ما عندهم لفل معيّن، لكن بيتغير لعبهم حسب الاسلحة اللي تعطيهم. لو تعطي الواحد سنايبر بيصير يتصرّف كسنايبر.

بما انكم بتطلقون اللعبة على بلايستيشن 3 وبلايستيشن 4، هل بيقدرون اللاعبين من الجهازين يلعبون مع بعض؟

لا للاسف.

سؤال أخير، وش أكثر شي متحمس له في الجزء الجاي من السلسلة؟

هو شي يبدو صغير، بس أعتقد أنه شي جبار. ناس كثير ما عندهم مايكات، وحتى اذا صار عندهم مايكات ممكن يصيرون مزعجين أو يصارخون أو يسبون، وأنا احب اعطيهم ميوت كلهم. وبما أني أحب أطوار اللعب الجماعي، فكنت دائماً اتمنى تكون فيه طريقة لتطوير اللعب كفريق. الآن اللعبة فيها خاصية ان اللاعب تلقائياً يذكر الاحداث المهمة اللي تصير قدامه. يعني اذا شاف جندي فوق برج، فبتسمع الكمبيوتر يقول “فيه واحد في البرج!”، وهالشي يساعد بشكل كبير في اللعبة.

شكراً على وقتك، حمستنا للعبة!

شكراً لك

—-

وش رأيك في المعلومات اللي موجودة في هالمقابلة؟ هل غيرت وجهة نظرك عن اللعبة؟ هل حمستك لها؟ شاركنا برأيك في التعليقات!

الوسوم
اظهر المزيد

مشهور الدبيان

مؤسس سعودي جيمر، متخصص في تطوير المواقع والتطبيقات، ومهتم في الذكاء الاصطناعي.
إغلاق