مقابلاتمقالات

سوّينا مقابلة حصريّة مع مطوّر لعبة The Witcher 3، وحصلنا على معلومات رهيبه

jemeelwithwitcherdev

في رحلة لمشهور وجميل الى دبي، سوّينا مقابلة مع مطور لعبة The Witcher، اللي اسمه CD Projekt. قدرنا نجيب من عندهم معلومات رهيبة. بدون مقدمات أكثر، هذي المقابلة.

جميل: أجزاء ويتشر اللي قبل كانت موجهة الى جمهور معين وخاص، أما الآن مع الجزء الثالث للسلسلة فالوضع تغير وصاروا أغلب اللاعبين يعرفونها وينتظرونها تنزل. كيف تقدمون قصة الجزء الثالث على الرغم من ارتباطها بالأجزاء اللي قبل؟

أول ما بدأنا عملنا على اللعبة كنا عارفين أنه بيكون فيه ناس جديدين على السلسلة وعشان كذا ركزنا على بناء قصة مناسبة للناس اللي يلعبون السلسلة لأول مرة عشان ما يحس اللاعب أنه ضايع وما يدري وش السالفة وما يعرف هذا مين ووش إسمه. ولهذا السبب إشتغلنا بكل جهد على مقدمة اللعبة واول ما تخلص من المقدمة بيكون عندك تصور عام عن اللعبة. بنعرف اللاعب على أساسيات ذا ويتشر، مثل من هم الويتشرز وان وظيفتهم الرئيسية هي قتل الوحوش لكن جيرالت بطل اللعبة يختلف عن الباقين، و عنده هدف معين. بتعرف مين هم أصدقائه وأنه في حرب صايرة في اللعبة لكن برضوا بيكون فيه اشياء ترضي عشاق السلسلة بشكل عام راح يشوفون مناطق وشخصيات قديمة مرت عليهم في أحد الأجزاء.

جميل: شخصيا ما تعمقت في المهمات الجانبية لكني لاحظت أنه حتى المهمات الجانبية لها قصص مثيرة للإهتمام لدرجة إني أحيانا اقول بركز على قصة هذه المهمة وأسحب على القصة الرئيسية فسؤالي هو هل كل الحوارات حقت المهمات الجانبية بيكون فيها تمثيل صوتي؟

نعم تقريبا كل المهمات اللي تتحاور فيها مع شخصية معينة راح يكون فيها تمثيل صوتي لكن فيه مهمات قليلة ما راح يكون فيها تمثيل صوتي لأنه ما في شخصية تكلمها أصلا. زي مثلا تلقى جثة مرمية جنب الشاطئ وتلقى عندها رسالة غامضة تقراها وتحاول تحل الغموض اللي فيها. زي هذه الأشياء الصغيرة هدفها تشجيع اللاعب على إستكشاف عالم اللعبة. بالنسبة للمهمات اللي فيها تفاعل مع شخصيات كلها مصممة يدويا وما فيه مهمات مصممة بشكل تلقائي من اللعبة لأن هالشيء قد جربناه من قبل. هو صحيح أن عالم العبة كبير وبيكون سهل أننا نعيد إستخدام نفس الأشياء بطريقة تلقائية لكن حسينا هالشيء ما ينفع أبدا وما يتناسب مع الجودة اللي نطمح لها. لذلك كل قصة جانبية لها قصة خاصة وليست مجرد تجميع أشياء وبعدين تروح تسلمها وخلاص. لأنه مهما كانت بساطة المهمة راح تتعرف من خلالها على صاحب المهمة ودوافعه.

مشهور: ما مدى تأثير خيارات اللاعب على قصة اللعبة؟

 طبعا إختيار الخيارات والعواقب المترتبة عليها مهم جدا في سلسلة ذا ويتشر وهالشيء ما زال موجود في الجزء الثالث. راح يكون فيه قرارات مهمة يختارها اللاعب أثناء تقدمه في القصة الرئيسية وايضا على مستوى المهمات الجانبية والشخصيات اللي في اللعبة. زي مثلا في شخصية من شخصيات اللعبة في أحد القرى ممكن يموت في نهاية القصة أو يستمر عايش وهذا يعتمد على الحوار اللي صار بينك وبينه والخيارات اللي اخترتها. طبعا ما راح اقول مين هي الشخصية عشان ما أخرب عليكم.

thewitcher3pic2

مشهور: كيف تربطون المحصلة أو النتيجة النهائية لهذه القصص مع بعض؟

هذا أصعب تحدي لنا فيما يخص كتابة القصة لأن بطبيعة الحال اللعبة ضخمة وتفاعلية وتحتاج منك على الأقل 100 ساعة لعب عشان تخلصها وعندك أشياء كثيرة تقدر تسويها بما أن اللعبة عالم مفتوح. فكان لازم نحرص ان كل هذه المهمات تعمل بتركيبات مختلفة بحيث أنك إذا قتلت الشخصية “أ” راح تقابل الشخصية “ب” وهكذا. هالشيء تطلب مننا الكثير من العمل والجهد واظن أن النتيجة النهائية كانت جيدة والأمور ماشية تمام ومسألة أن اللعبة تتفاعل مع الأشياء اللي تسويها تعتبر إستراتيجية مرنة جدا.

مشهور: هل تتوقع كل اللاعبين بتجيهم نفس نتائج ردود الفعل العاطفية ونفس المشاعر مع القصة أو هل في لاعب بتصير قصته مرة مؤثرة وعاطفية ولاعب ثاني تطلع قصته باردة؟

لا. أولاً من ناحية العاطفة فهي على مستوى متغير. ما نحب نحط خيارات توضح وش الخيار الصح ووش الخيار السيء أو نحط شيء واضح إذا إخترته تصير طيب أو إما تكون شرير فممكن تطلع شرير في النهاية وانت ما تدري على حسب إختياراتك. أحيانا تختار الخيار الفلاني ظنا منك أنه هو الخيار الصح لكن ممكن أن تبعات هذا الإختيار تطلع سيئة بعدين. الشيء الثاني أشوف أن قصة ذا ويتشر 3 بتكون جذابة وأنا جدا سعيد بالمرحلة اللي وصلت لها الألعاب حاليا بحيث خلاص ما صارت تقتصر على تقديم المتعة فقط وإنما تقدم لك قصة مؤثرة تخليك تفكر في الأشياء اللي سويتها. وأظن أن ذا ويتشر قدرت توصل لهذه المرحلة.

جميل: بالنسبة للشخصية الثانية القابلة للعب سيري هل طريقة اللعب فيها مرتبطة بالقصة يعني ما راح نقدر نلعب فيها لين نوصل للجزئية حقتها في القصة وبعدين نرجع نلعب بالبطل وأن ما في خيار يسمح لك تختار الشخصية اللي تبي تلعب فيها؟

نعم صحيح ما راح تقدر تختار الشخصية اللي تبي تلعب فيها. لأن شخصية سيري لها دور مهم في القصة وحسينا أن هالفكرة بتضيف تجديد وإنعاش لطريقة اللعب وكيف تشوف أحداث القصة من منظورها هي. طبعا طريقة قتال الشخصية تختلف عن بطل اللعبة جيرالت. بيكون لها حركات وقدرات خاصة فيها وأقدر أقول أنها أقوى من جيرالت بطل اللعبة.

مشهور: بعد ما ينتهي اللاعب من القصة الرئيسية هل بيكون فيه أشياء وقصص زيادة يقدر يلعبها؟

 نعم أكيد بيكون فيه محتوى كبير بعد ما تخلص القصة طبعا في بعض المهمات اللي لها علاقة بالقصة بتتقفل وما تقدر ترجع تعيدها لكن عالم اللعبة بيكون مفتوح لك بعد ما تنهي اللعبة عشان تستكشف فيه.

الوسوم
اظهر المزيد

يزيد السويري

مترجم تخصص لغة إنجليزية أحب ألعاب ننتندو زي "super smash bros" و "Mario & Luigi" و"ماريو 64" أموت في شي إسمه Dynasty Warriors و نوع الألعاب المفضل عندي هو"hack and slash".
إغلاق