العاب السيارات القتالية، فكرة ممتازة او مستهلكة؟

بمناسبة قرب اصدار لعبة ماريو كارت 8 (Mario Kart 8) قررت اكتب مقالة عن العاب السيارات القتالية، طبعاً اللي اقصده من مسمى ” العاب سيارات قتالية ” ان لها اسلوبين تتميز فيها هالنوعية من الألعاب..

الأسلوب الأول: انك تتسابق مع الناس ويكون عندك ادوات تستخدمها باللعب، منها انك تضرب عدوك بطرق مختلفة سواء ترمي عليه قنبلة متفجرة او موزة يتزحلق فيها والخ، او انك تستخدم أداة تزيد سرعة السيارة او تحميك من الضربات لفترة محدودة، ومنها ادوات ثانية كثيرة.

الأسلوب الثاني: انك تتقاتل مع اعدائك باللعبة بالسيارة الخاصة فيك، واللي يبقى للنهاية أو يقتل العدد الاكبر من الاعداء يفوز، هذا اشهر نوع من الالعاب، والمقال هنا يتكلم عن هالنوعية من الألعاب، والسؤال اللي يطرح نفسه..هل الألعاب اللي من هالنوعيه قدرت تعيش؟ وهل فيه العاب تطورت العاب بنفس هالأسلوب الممتاز؟، أو بس السلاسل المحافظة على هالنوعيه من الالعاب هي اللي قادره تبقى ليومنا هذا؟.. عشان نعرف الجواب خلونا نشوف بعض الالعاب اللي تركت لها بصمة بتاريخ الالعاب.

Mario Kart

مافيه لعبه نبدأ بها في هاللستة افضل من سلسلة ماريو كارت (Mario Kart)، السلسلة هذي تعتبر من أول الالعاب اللي نزلت بأسلوب العاب السيارات القتالية، وأول جزء لهاللعبة نزل لجهاز السوبر نينتيندو (SNES) وكان بوقتها ثورة بعالم الالعاب، اللعبة نزلت بعام (1992)، الفكرة والشخصيات اللي باللعبة اضافوا متعة جديدة ونكهه خاصة للعب الجماعي، اللعبة نجحت بكل المقاييس ومن بعدها تعودنا انها تنزل بكل جيل لأجهزة نينتيندو (Nintendo) وحتى المحمول كان له نصيب من اجزاء هالسلسلة. من الشغلات اللي تميز سلسلة ماريو كارت عن باقي الالعاب اللي مشت على خطاها؛ هي التوازن باللعبة. اللعبة جدا موزونة سواء بشخصيات اللعبة او المراحل اللي فيها او الاسلحة اللي تطلع لك بشكل تلقائي. الجزء المخصص لجهاز الوي (Wii) يعتبر واحد من اكثر خمسة ألعاب باعت بالتاريخ، وهذا شيء يعطيك نظرة قد ايش هالسلسلة ناجحة ومحبوبة من عشاق العاب السيارات.

Twisted Metal

السلسلة هذي تعتبر من الأسلوب الثاني بمقالنا، وهي لعبة سيارات قتالية بس مافيها سباق، هالسلسلة كانت من اقوى حصريات سوني بنهاية التسعينات؛ وكانت شيء يختلف تماماً عن العاب السيارات اللي تعودنا عليها، بإختصار فكرة اللعبة تختار شخصية من عدة شخصيات باللعبة وتبدأ تقاتل اللي حولك سواء الكمبيوتر او الناس اللي جالسين جنبك ونت تلعب في بيتكم، كل شخصيه لها قدرة خارقة خاصة فيها، وهذي من العوامل اللي تميزت فيها اللعبة عن لعبة ماريو كارت، غير تنوع السيارات المهوول باللعبة؛ شاحنات ودباب يسوقه هيكل عظمي او شخص مربوط بيدينه كفرات كبيرة، كانت جدا مختلفة عن باقي العاب السيارات وخاصه القتالية، ومراحل اللعبة كانت كبيرة وتصميمها جدا متقن للقتال، بعد أول جزئين للسلسلة للأسف نزل مستواها وقلت شعبيتها مع مرور الوقت، وآخر جزء لها نزل بعام (2012) لجهاز البلايستيشن 3 (PS3) كان مخيب للأمال الصراحة.

Diddy Kong Racing

اللعبة هذي ما دخلت القائمة عبث؛ رغم ان مالها الا جزء واحد بس، لكن أفكارها المتنوعة خلتها لعبه تُخلد بذاكرة أي شخص لعبها بوقتها، اللعبة فيها ثلاث طرق تختار منها واحد عشان تبدأ المرحلة، يا تختار سيارة سباق عادية او طيارة او قارب صغير، والغريب بالموضوع هنا ان كلهم موزونين جدا باللعب، اللعبة تقدم لك اساليب جديدة مثل انك تتسابق للنهاية او انك تقاتل اللي معك لين تبقى للنهاية او انك تلعب بمرحلة طيارات ومهمتك تاخذ أكبر عدد من البيض وترجعه لعشك!!، افكارها والمراحل وتعدد الشخصيات اللي في اللعبة كثيرة، وكل هالعوامل ساعدت انها تكون لعبه مميزة جدا عن باقي العاب اللي ذكرتها سابقاً، للأسف ماشفنا اي جزء جديد للسلسلة والسبب علاقة نينتيندو مع فريق التطوير رير (Rare) تدهورت جدا وليومنا هذا للأسف متدهوره.

Crash Team Racing

أغلبنا استمتع بمغامرات كراش على البلايستيشن 1 (PS1)، السلسلة اللي أبدعت فيها نوتي دوق (Naughty Dog) بكل ما تعنيه الكلمة من معنى، وكانت من افضل المغامرات بمنتصف التسعينات؛ لكن الجزء اللي نبي نتكلم عنه اليوم مختلف عن باقي اجزاء السلسلة وهو جزء سيارات سباق بشخصيات سلسلة كراش المعروفة، الجزء هذا كان رد لحصرية نينتيندو القوية ماريو كارت، وكانت تنافس ماريو كارت 64 على وقتها وبقوة. البطولات اللي في اللعبة كثيرة وممتعة للي يبي يلعب اللعبه لحاله، وحتى اللعب الجماعي ما يقل متعة عن اللعب الفردي، التنوع بالسيارات والشخصيات ممتاز، غير الاسلحة اللي تضيف نكهة خاصة؛ وحتى الطرق المختصره المتنوعة اللي بالمراحل. اللعبة رجعت على عهد البلايستيشن 2 (PS2) بتطوير فريق مختلف وعنوان جديد للعبه بأسم جديد (Crash Tag Team Racing)، الجزء ما كان سيء بالنسبة لي؛ كان خليط بين لعبة مغامرات وسباق، لكن ما وصل طموحه للعبة الأصلية طبعاً.

Cel Damage

أخر لعبة في مقالنا اليوم، ممكن بعضكم يستغرب دخولها بالقائمة وممكن بعضكم ما يعرفها، لكن اذا جينا لهالصنف من الالعاب تجي ببالنا هاللعبة، طبعا مافيها سباق؛ تعتبر قتال سيارات، بس المميز فيها ان أسلوب اللعب فيها جدا سريع وسلس، غير اسلوب الرسم الكرتوني (Cel Shading) اللي تميزت فيه وضبطته، تعدد بالسيارات والشخصيات والمراحل الغريبه؛ مراحل بالصحراء ومراحل بالفضاء وغيرها الكثير. العوامل اللي تصير بالمرحلة تضيف متعة خاصة، مثلاً تجيك عاصفة رميلة تخرب عليك اللعب او على خصمك، وفيها ضحك ما يوقف على طريقة اللعب وشطحات الشخصيات واسلوب لعبهم. الحلو بالموضوع من وقت قريب نزل لها اصدار عالي الوضوح (HD) لاجهزة البلايستيشن 3 و 4 والبلايستيشن فيتا.

الختام

أنتهت رحلتنا اليوم لألعاب تميزت بهالأسلوب النادر جدا بعالم الالعاب ووش صار عليها. وش رايك عزيزي القارئ بهالنوعية من الالعاب؟ وهل فيه العاب تشوفها ممتازة ما ذكرناها بالمقال؟ ياليت تذكرها لنا هي ورأيك بالموضوع في التعليقات.