أخبار

مطوّر لعبة Destiny يحذّر من التقييمات والمراجعات اللي بتنزل بدري

destinypic13

حذّر Bungie مطوّر لعبة ديستني اليوم من التقييمات والمراجعات اللي بتنزل بدري، وتحديداً في أول يوم من صدور اللعبة، وقال انها ماراح تعطيك الصورة الحقيقية لتجربة اللعبة.

في مدونة الموقع الرسمية، يقول المطوّر ان هذي لعبة MMO (لعبة أونلاين يلعبها عدد كبير من اللاعبين)، ومعنى هذا ان المقيّم أو المراجع لازم يلعبها مع الناس عشان يقدر يقيمها، واذا نشر تقييمه في أول يوم من نزول اللعبة فمعناته ان ماله 24 ساعة مع اللعبة، وهذا وقت غير كافي لتقييم اللعبة.

من الكلام المكتوب في المدونة: “نتوقع نشوف تقييمات ومراجعات من أول يوم لنزول اللعبة، وهم ناس قرروا يقيمون اللعبة لان ما يقدرون يصبرون على اللعبة وياخذون وقتهم معها. بعضكم ممكن ينتظر الين ما يشوف مراجعة الناقد المفضّل بالنسبة له، وحنا ما عندنا مشكلة بهذا. حنا صنعنا لعبة نفتخر فيها”.

المطوّراستغل هالفرصة عشان يشرح ليش تقييمات اللعبة بتنزل متأخر، وان الناقد لازم يلعب اللعبة مع الناس: “حنا شفنا كل الخيارات عشان نملأ عالم اللعبة باللاعبين عشان يعيش الناقد التجربة الحقيقية للعبة. فريقنا يتوقع ان الناقد يحتاج آلاف اللاعبين عشان يصير كل نشاط أو مهمة في اللعبة موجودة وتقدر تلعبها. كيف بتسوي هذا الشي لو خلينا النقاد يلعبون لحالهم؟”

بعض اللاعبين كانوا مستغربين ليش التقييمات ما نزلت للحين، بما ان موعد صدورها بكرة. اليوم وضحت بنجي سبب تأخر التقييمات، وهو ان الناقد لازم يلعب اللعبة مع باقي اللاعبين عشان يمتلي العالم، وبكذا يعيشون التجربة الحقيقية للعبة.

وش رأيك بتصريح بنجي؟

الوسوم
اظهر المزيد

محمد الشريف

كاتب ومدير تحرير موقع سعودي جيمر. أعشق ألعاب الفيديو من يومي صغير (ايه كلنا كذا)، أحب ألعاب التخفّي والرعب، وأعشق سلسلة Metal Gear ولعبة Silent Hill وICO.
إغلاق