E3 2014أحداثمقالات

لقاءنا الصحفي مع مطوّر لعبة BloodBorne (تغطية معرض E3 2014)

bloodbornecoverpic

من أكثر لألعاب اللي متحمسين لها، وكيف ما نتحمس للعبة القادمة من الرجل اللي قدم لنا Demon’s Souls وDark Souls، لعبتين يضرب فيهم المثل في عقاب اللاعب على أخطاءع وتعذيبه عليها؟

أول شي لاحظناه في الديمو اللي عرضوه لنا كان عالم اللعبة، واللي يبدو انه مختلف عن دارك سولز وأقرب الى ديمونز سولز من ناحية الظلام بشكل عام. طلع اللاعب في الديمو الى مكان عالي شوي يعرض لك أماكن بعيدة في اللعبة، وقال لنا المطوّر ان بامكانك توصل لكل الأماكن اللي تشوفها ورا. هذا شي يذكرني (وحببني) في دارك سولز، بحيث تحس ان العالم كله متصل ببعضه بطريقة عبقرية. صحيح انك تضيع شوي في البداية، لكن أي مكان تمر فيه تحفظه ويتخزن في راسك.

طريقة القتال شبيهة بشكل كبير لدارك سولز، لكن يبدو ان فيها عناصر آكشن أكثر. الشخصية اللي كانت تلعب ماسك بيده اليمين سلاح زي السيف، واليد الثانية سلاح زي الشوزن Shotgun. تطمنا يوم قالنا ان الشوزن ما راح يكون له أثر كبير، وان دوره الرئيسي انه “يخدّر” العدو بحيث تقدر تستغل فترة التخدير حقته وتضربه ضربات قاضية بالسيف حقك.

الأرهب من هذا ان الطلقات بتكون محدودة جداً في اللعبة، بحيث اللاعب يحسب حساب كبير قبل لا يطلق بالسلاح اللي معه. هذا شي مريح، بحيث اللاعب لا زال مضطر انه يروح للعدو ويقاتله وجهاً لوجه، بدال ما يصير واقف بعيد ويطلق على الأعداء ويموتهم واحد واحد.

فيه برضه شي رهيب مرة، وهو اننا مرينا من عند لاعب كمبيوتر -NPC- يضارب وحوش، وقالنا المطوّر ان بامكاننا نساعد هذا الشخص بحيث يصير يساعدنا بعدين.

غير هذا كله، الرهيب في الموضوع ان اللعبة شكلها بتكون أفضل من ديمونز سولز ودارك سولز من ناحية الانتاج، ديمونز سولز كان صعب على سوني انها تدفع على لعبة ماهم عارفين هل بتنجح أو لا، ودارك سولز ما جاها ميزانية كبيرة، لكن هذي المرة الوضع يختلف تماماً. سوني تعرف ان Miyazaki مخرج اللعبة عنده القدرة انه يسوّي لعبة ناجحة.

بشكل عام، الديمو اللي عرضوه لنا كان قصير وأكثر الأسئلة اللي سألناها تحفّظ عن اجابتها وقال ان اللعبة لا زالت في مرحلة التطوير.

بتزل اللعبة في عام 2015، لسا ما تحدد اليوم والشهر.

الوسوم
اظهر المزيد

محمد الشريف

كاتب ومدير تحرير موقع سعودي جيمر. أعشق ألعاب الفيديو من يومي صغير (ايه كلنا كذا)، أحب ألعاب التخفّي والرعب، وأعشق سلسلة Metal Gear ولعبة Silent Hill وICO.
إغلاق