أفضل لعبة جوّال (أفضل ألعاب 2013)

ألعاب الجوال، وهي ألعاب تطوّرت بشكل هائل في السنوات اللي راحت. بعد ما كانت عبارة عن ثعبان ياكل ويصير شكله طويل، وفي الأخير أنت مهزوم مهزوم، صارت ألعاب الجوال تضاهي ألعاب الأجهزة المنزلية من ناحية الشهرة.

Superhexagon من أبرز ألعاب الجوّال اللي لعبناها هذي السنة، تميّزت ببساطة فكرتها، وبرضو تميّزت بصعوبتها! Infinity Blade 3 استمرت في التطوّر للأفضل وقدمت لنا جزء ثالث متطوّر عن الأجزاء اللي قبل.

Device 6، بفكرتها الغريبة والرائعة جداً، تميزت بأسلوبها الغريب وهو انك تقرا قصة وتتفاعل معها، بحيث بعض الأحيان يطلب منك تقلب الجوال وتكمل قراءة الأحداث وتتفاعل معها بطريقة مالها مثيل. Rayman Fiesta Run كان لها ظهور خرافي هذي السنة على الجوالات، وقدرنا أخيراً نلعب رايمان على الجوال بتجربة قريبة جداً من تجربة الأجهزة المنزلية.

Plants vs. Zombies 2 هي أفضل لعبة جوّال هذي السنة. على ان الجزء الأول منها كان ادماني من الدرجة الأولى، الا ان الجزء الثاني قدر ينتقل لمستوى أفضل. لا زالت بلانتس فيرسز زومبيز 2 من أكثر ألعاب الجوال اللي تقدر تلعبها على الطاير، وتقدم لك تجربة رائعة جداً. أضف الى هذا كله ان اللعبة مجانية، وانك تقدر تكمل اللعبة كلها بدون ما تشتري ولا شي من داخل اللعبة!

وش رأيك في Plants vs Zombies 2؟ ووش أفضل لعبة جوال بالنسبة لك هذي السنة؟ شاركنا رأيك في التعليقات!