Saudi Gamer
الشخصيات، وخصوصاً الرئيسية- من أهم أسباب نجاح القصة، ومع كل لعبة نشوف شخصية -غالباً- جديدة، سواءً ذكر أو أنثى. في عالم ألعاب الفيديو، أو في عالم الترفيه عموماً، غالباً بطل اللعبة يصوّر على انه رجل بطل مغوار منقذ للعالم، صاحب شعر أشقر وعيون زرقا.
ولكن هذا الشي بدأ يتغيّر، ولو على شي خفيف. نشوف شخصيات رهيبة في كل سنة، وهالسنة شفنا Trevor Philips من GTA V الشخصية العجيبة الفكاهية الشاطحة، واللي ضحكنا على كثير من مواقفه، بالاضافة الى شخصيته المتميّزة واللي ما تلقى مثلها. Drippy من Ni Nu Kuni برضو من الشخصيات الفكاهية اللي كنا نضحك عليها في اللعبة، واللي أضافت جرعة فكاهة ممتازة للعبة.
Big B من The Wolf Among Us كان من أبرز الشخصيات اللي شفناها هذي السنة. شخصية عبارة عن محقق او حامي البلدة اللي عايش فيها، يحقق في الجرايم وأحداث الشغب اللي تصير في اللعبة. تميّز بيق بي بكونه جزء من اللعبة اللي عالمها خيالي، بحيث كل شخصية لها قدرات خيالية، وقدرات بيق بي الخيالية أضافت له اضافة كبيرة جذبت انتباهنا بشكل كبير.
أما بالنسبة للزاحف Sergeant Rex Power Colt، من اضافة FarCry 3: Blood Dragon فكان هو الأفضل بين المرشحين كلهم. تميّز ريكس بكونه شخصية فكاهية من الطراز الرائع، بحيث وصل استهباله الى اللعبة نفسها اللي أنت تلعبها، بالاضافة الى استهباله على الألعاب الكلاسيكية. هذا النوع من الفكاهة متميّز جداً، خصوصاً وانه تم تضبيطه في الاضافة بحيث طلع فينا بتجربة ما ننساها.
كل هالأسباب خلتنا نختار Sergeant Rex Power Colt كأفضل شخصية شفناها هذي السنة!
وش رأيك في Sergeant Rex Power Colt؟ ووش أفضل شخصية ذكر بالنسبة لك هذي السنة؟ شاركنا رأيك في التعليقات!
