أفضل لعبة مطوّر مستقل في 2014

الفائز في جائزة أفضل لعبة مطوّر مستقل هي لعبة Shovel Knight. نزلت اللعبة على ننتيندو 3DS وWii U وعلى البي سي، وبتنزل قريباً على بلايستيشن 4 وبلايستيشن فيتا.

ألعاب المطوّر المستقل ظهرت قيمتها في الفترات الأخيرة بشكل كبير، وصارت مثل السلاح الحاسم بين الشركات الكبيرة، خصوصاً سوني ومايكروسوفت. في الجيل الماضي، قدرت مايكروسوفت انها تكسب أكثر من لعبة مطوّر مستقل بشكل حصري على اكس بوكس 360 (على الأقل وقتها)، وقدرت سوني بعدها انها تعدّل أوضاعها من ناحية المطوّر المستقل على نهاية الجيل وكسبت ألعاب كثيرة منه. مع بداية الجيل الجديد، احتوى بلايستيشن 4 على عدد هائل من ألعاب المطوّر المستقل، ولا يهون بلايستيشن فيتا.

السنة هذي نزل عدد كبير مره من ألعاب المطوّر المستقل، واستمتعنا بالكثير منها، واخترنا الأفضل وحطيناهم كمرشحين للجائزة:

• Transistor
• Never Alone
• Shovel Knight
• Goat Simulator

لعبة ترانزستور كانت من أكثر الألعاب اللي استمتع فيها جميل عبدالأحد ومحمد الشريف في بداية السنة، مستوى الموسيقى والرسوم فيها كان استثنائي، حتى لو قارناها بألعاب بميزانيات ضخمة ومن شركات كبيرة. لعبة Never Alone قدّمت تجربة مختلفة بحيث ركّزت على الجانب الثقافي وتم تقديم الفكرة بشكل جميل. أخيرًا، لعبة Goat Simulator اللي ضحكتنا كثير وانبسطنا عليها، وسوينا عليها فيديوات في قناتنا بيوتيوب.

أما شوفل نايت، أو فارس المجرفة (بالعربي اسمها رهيب)، فهي أفضل لعبة مطوّر مستقل لعبناها السنة هذي. اللعبة ركّزت على عناصر كثير وكلها تفوّقت فيها، وقدمت لنا تجربة استثنائية بالنسبة لألعاب المطوّر المستقل. يميّز اللعبة أسلوبها الكلاسيكي البحث، والموسيقى الرهيبه اللي فيها، وطريقة اللعب الممتعة.

وش أفضل لعبة مطوّر مستقل بالنسبة لك هذي السنة؟