أكثر لعبة خوّفتنا في 2014

الفائز في جائزة أكثر لعبة خوّفتنا في 2014 هي لعبة The Evil Within. نزلت اللعبة على بلايستيشن 4، بلايستيشن 3، اكس بوكس ون، اكس بوكس 360، بي سي.

لو كنت تلعب في التسعينات، فاحتمال كبير انك تذكر أسامي ألعاب رعب كبيرة مثل Clock Tower و Silent Hill و Resident Evil و Parasite Eve وغيرها الكثير. اليومين هذي الرعب تغيّر بشكل كبير، وصارت ألعاب الرعب قليلة، واذا نزلت لعبة رعب فهي غالباً تحتوي على عناصر آكشنية، ولنا في Resident Evil خير مثال في سنواتها الأخيرة.

السنة هذي نزلت ألعاب رعب رائعة، هذي اختياراتنا منها:

• Alien: Isolation
• The Evil Within
• Daylight
• 5 Nights at Freddy’s

لعبة Alien لعبة رعب تعتمد على عنصر البقاء على قيد الحياة، ومن الألعاب اللي تحسسك بالوحدانية والضعف، وهذي عناصر مهمة في ألعاب الرعب. لعبة Daylight نزلت وسوّت ضجة وأعجبت أصحاب قنوات يوتيوب وصار عليها فيديوات أعجبت الناس، ونفس الشي بالتمام مع لعبة فايف نايتس آت فريديز.

أما بالنسبة للعبة The Evil Within، فهي أكثر لعبة خوّفتنا هذي السنة لأسباب مختلفة. اللعبة هذي لو تتفرج عليها ممكن تقول عليها رعب رخيص، لكن في اللحظة اللي تلعبها وتتعمّق فيها بتلاحظ انها لعبة رعب مختلفة. لعبة ذا ايفل ويذين تلعب على عنصر تخويف اللاعب نفسه، بحيث يخاف اللاعب لانه فعلاً أضعف من الأعداء، عندك كم سلاح لكن مافيها الا طلقة أو طلقتين، عندك اسعاف أو اسعافين ولازم تحسب حسابهم ألف مرة. هذا غير ان اللعبة “هاردكورية” بزيادة، ونقصد فيها انها صعبة ولا يقدر أي لاعب يلعبها ويندمج معها.

عشان هالأسباب كلها، اخترنا لعبة The Evil Within كأكثر لعبة خوّفتنا في 2014.

وش أكثر لعبة خوّفتك في 2014؟