Saudi Gamer
ألعاب الرعب، النوع من الألعاب اللي تأثر كثير هذا الجيل وهبط مستواه. قلّت ألعاب الرعب في هذا الجيل وطاحت سلسلات كانت تعتبر أساطير الرعب مثل Silent Hill وResident Evil وFatal Frame وغيرها.
هذا كله ما يعني ان الرعب انتهى تماماً، لا زلنا نشوف بعض ألعاب الرعب الرائعة، خصوصاً من المطورين المستقلين. شفنا هذي السنة Lone Survivor على الأجهزة المنزلية -بالاضافة للفيتا- تروي قصة مرعبة نفسياً، لعبة ركزت على تقديم قصة من الطراز النادر للاعب، مخلوطة مع موسيقى تصويرية مخيفة جداً وفي بعض الأحيان… جميلة! ذكرتنا هذي اللعبة كثير بأسطورة من أساطير الرعب، وهي Silent Hill.
Amnesia: A Machine for Pigs وهي الجزء الجديد للعبة المفاجئة Amnesia: Dark Descent واللي أرعب العالم بطريقة لعبها الرهيبة، واللي ما تسمح للاعب انه يهاجم أو يقاتل، كل اللي يسويه انه يهرب من الأعداء ويختبي منهم، وهذا عنصر رعب مهم جداً فقدناه هذا الجيل.
لكن كل هالتجارب المرعبة ما أعطتنا التجربة المخيفة اللي عشناها في Outlast، وهي وضع اللاعب في عالم مظلم، وهو عبارة عن مصحّة نفسية يلاحقونك فيها ناس مختلّين عقلياً، والعجيب فيها انك ما تدري من اللي يلاحقك فيهم أو من ما يلاحقك. برضو اللعبة تستغل عامل مرعب جداً وهو عامل الظلام، بالاضافة الى ان اللاعب ضعيف وعاجز عن المقاومة، فما له الا يهرب من الأعداء. بامكانك تشوف الفيديوات اللي سويناها عن اللعبة.
عشان كل هالأسباب اللي ذكرناها، قررنا نختار لعبة Oultast كأكثر لعبة خوّفتنا هذي السنة!
وش رأيك في Outlast؟ ووش أكثر لعبة خوفتك هذي السنة؟ شاركنا رأيك في التعليقات!
ملاحظة: تم وضع لعبة Gone Home ضمن المرشحين بالخطأ، لذلك نعتذر لكم.
