كوننا جيمرز، استمتعنا بكميات هائلة من الألعاب. منها العاب التصويب، المناقز، المغامرات، المضاربات، وغيرها. لكن كثير من الناس اللي ما لهم في ألعاب الفيديو ما يقدرون يستوعبون المتعة في هذه الألعاب لكثير من الاسباب منها صعوبة التحكم وصعوبة معرفة هدف اللعبة. عشان كذا اليوم بعطيكم قائمة العاب يستمتع بها الكل (الجيمر وغيره):
Wii Sports
هذه اللعبة اللي عرّفت العالم على التحكم الحركي (Motion Controls). بغض النظر عن فشل كثير من المطورين في تطوير الالعاب اللي تعتمد على التحكم الحركي، سلسلة Wii Sports نجحت نجاح باهر في جذب غير اللاعبين بسبب تحكمها السهل والبسيط؛ تمسك الوي ريموت وتلعب الرياضات كأنك تلعبها في الحقيقة.
Portal 2
يمكن ان تحكمها مو سهل بالنسبة لغير اللاعبين لأنها لعبة من المنظور الأول (First Person View)، لكنها ما تحتاج الخبرة في التحكم عشان الواحد يتخطي حواجز اللعبة في اغلب الأحيان. يعني اللاعب يقدر يمخمخ على كيفه. وطبعاً لا ننسى اهم عاملين في اللعبة: حل الألغاز وطور تعدد اللاعبين.
Journey
جمال هذه اللعبة مو الشيء الوحيد اللي يجذب الناس؛ الموسيقى الرائعة، التحكم البسيط، الهدف واضح، وعدم وجود الحوار والقتال يخلي هذه اللعبة جذابة للاعبين وغير اللاعبين.
Tetris
اعتقد ان اغلب الناس يعرفون هذه اللعبة؛ سواء لعبوها على الجيم بوي، الجوال او غيرها من الاجهزة. لعبة سهلة وبسيطة لكن تتعمق فيها مع كثر اللعب. هدفها بسيط: تحاول تركب اكثر عدد ممكن من السطور.
The Walking Dead
قصة هذه اللعبة تكفي للفت انتباه غير اللاعبين، لكن مع اضافة شُهرة مسلسلها التلفزيوني، تحكمها التفاعلي، وتجزئة قصتها الى حلقات؛ تطلع لك لعبة تجذب حتى اللي وقته ضيق في حياته اليومية.
Castle Crashers
هي لعبة من نوع “طق وإمش”. هذه اللعبة مثال قوي للألعاب اللي تدخّل غير اللاعبين الى عالم ألعاب الفيديو وتخليهم يصيرون جيمرز. اللعبة بسيطة جداً في البداية وشوي شوي تصعب مع التقدم في اللعبة، بالإضافة الى رسمها البسيط وامكانية اللعب مع 3 لاعبين.
وش الألعاب اللي تحسون انها تنفع للناس اللي ما لهم في العاب الفيديو؟ عطونا آرائكم!
