Saudi Gamer
اضافات الألعاب، من الأشياء الحديثة والدخيلة على ألعاب الفيديو. الكثير يكرهها ويعتبرها نصب من الشركات على اللاعبين، ويعتقد ان الشركات تشيل أجزاء موجودة في اللعبة أساساً عشان يبيعونها على اللاعبين بعدين بفلوس.
بغض النظر عن هالنظرة، تعطي بعض الاضافات تجارب اضافية كبير للعبة الأساسية. شفنا هالسنة الكثير من الاضافات الممتازة.
من أبرز المرشحين لهذي الجائزة اضافة The Knife of Dunwall تبع Dishonored، الاضافة الرهيبة والخرافية اللي أضافت اضافة هائلة للعبة، لدرجة ان البعض صار يقول ان قصتها أفضل من القصة الأساسية! فيه برضو اضافة Tiny Tina’s Assault on Dragon Keep للعبة Borderlands 2، واللي أضافت برضو اضافة فكاهية وشاطحة ورائعة مثل اللعبة الأساسية.
اضافة The Citadel للعبة Mass Effect 3 واللي كانت اضافة رائعة للقصة، خصوصاً وانها كانت الاضافة اللي متعطش لها الجمهور بعد سلسلة من الاضافات المحبطة. اضافة -وفي رواية توسعة- China Rising للعبة Battlefield 4 واللي أضافت اضافة هائلة على تجربة الأونلاين في اللعبة، وهذا شي ماهو غريب على دايس واضافاتهم لألعاب باتلفيلد.
تشوفون كل هالاضافات اللي تكلمنا عنها؟ اضافة FarCry 3: Blood Dragon أعطتنا تجربة أفضل منها كلها! تميّزت الاضافة بكونها فكاهية من الطراز الأول، خصوصاً وانها تستهبل على الألعاب الكلاسيكية بطريقة طريفة وتخلّي الألعاب القديمين يضحكون، وفي نفس الوقت يحنّون لأيام الزمن الجميل! هذا من غير ذكر الشخصية الممتازة في الاضافة، والأسلحة الرائعة، والأعداء والمراحل الجديدة، ولا تنسى انك تقدر تلعب الاضافة كلها بدون اللعبة الأساسية!
كل هالأسباب خلتنا نختار هالاضافة كأفضل اضافة لعبناها في هذي السنة، برافو فار كراي على الاضافة الجميلة!
وش رأيك باضافة Blood Dragon؟ ووش أفضل اضافة بالنسبة لك هذي السنة؟ شاركنا رأيك في التعليقات!
