ألعاب المغامرات، من أكثر الجوائز اللي نهتم فيها كل سنة. وفي كل سنة تنزل لنا دفعة كبيرة من ألعاب المغامرات الرهيبة.
من ضمن المرشحين هذي السنة، لعبة Batman: Arkham Origins -وفي رواية الرجل الوطواط: أصول الرخوم- واللي على انها ما كانت بمستوى الجزء اللي قبل، الا انها قدمت لنا تجربة جيّدة جداً. من ضمن المرشحين برضو Splinter Cell: Blacklist واللي أبهرتنا كثير بالمغامرة اللي عشناها فيها، بالاضافة الى أساليب التخفّي الرائعة اللي فيها والأطوار التعاونية اللي فضلها البعض على طور القصة.
Tomb Raider الأخيرة كانت من أبرز المرشحين لهذي الجائزة، واللي قدمت لنا من أروع التجارب هذي السنة. رجعت لنا لارا كروفت بشكل مختلف وممتاز، بعد سلسلة سنوات من الاحباطات المستمرة. The Legend of Zelda: A Link Between Worlds كانت من أبرز المرشحين، واللي أعجبت الكثير بمستواها الرائع سواءً عشّاق زيلدا أو غيرهم، لدرجة ان البعض اشترى الجهاز عشانها!
Assassin’s Creed IV: Black Flag هذي السنة هي كانت أفضل لعبة مغامرات بالنسبة لنا. كمّية الأشياء اللي تسويها في اللعبة كبيرة جداً، بالاضافة الى ان تجربة المغامرة فيها كانت الأفضل بين الألعاب اللي ذكرناها. يوبيسوفت عرفت أغلاطها من الأجزاء اللي قبل وقدرت تصلح جزء كبير جداً منها، وأعطتنا تجربة مغامرة نادر ما تلقاها في الفترات الأخيرة.
وش رأيك في Assassin’s Creed IV: Black Flag؟ ووش أفضل لعبة مغامرات بالنسبة لك هذي السنة؟ شاركنا رأيك في التعليقات؟
