Saudi Gamer
أو أفضل لعبة تقطيع، ونقصد بتقطيع انك تقطع الأعداء سواء بسيف أو تفقيع وجيه!
اذا شغلت اللعبة ولقيت البطل معه سيف، وتبدأ اللعبة تكب عليك من الأعداء بالكوم وانت تستلمهم واحد واحد وتقطّع فيهم، أو حتى ما كبّت عليك عدد كبير من الأعداء، لكنها تطلب منك استخدام سيف ودرع وحركات كلاسيكية، شي رهيب ياخي! ويدخل برضو ضمن هالتصنيف ألعاب المضاربات باليد أو بالعصي وغيرها من الأسلحة.
السنة هذي جانا خليط من الألعاب الرهيبة والألعاب العادية من هالنوع، شفنا Metal Gear Rising: Revengeance وعلى ان القصة والشخصيات -على عكس السلسلة الأساسية- كانت عبارة عن خرابيط، الا ان طريقة اللعب كانت رائعة، خصوصاً انها حاولت تضيف تقنيات جديدة لطريقة اللعب.
برضو عندنا لعبة Killer is Dead واللي على اننا كنا محبطين منها بشكل عام، الا ان طريقة لعبها كانت آكشنية من الطراز الأول، سريعة وحماسية والموسيقى التصويرية من يد الموسيقار المعروف أكيرا يوموكا أضافت للتجربة شي كبير. أخيراً عندنا Ryse: Son of Rome واللي كانت محبطة من نواحي كثيرة، الا ان اللعبة احتوت على بعض العناصر الآكشنية الرهيبة، ولو ان تخللها بعض التكرار اللي أصابنا بنوع من الملل.
ولكن كل هالألعاب ما أعجبتنا كثر ما أعجبتنا لعبة Devil may Cry! كثير كان متشائم من اللعبة بشكلها الجديد وبطلها الغريب والتغييرات الكبيرة اللي صارت في السلسلة، ولكن اللعبة قدرت تخالف كل التوقعات الضعيفة وقدمت لنا نظام قتال من الطراز الاسطوري. استمتعنا كثير بطريقة اللعب بشكل عام، ونظام القتال بشكل خاص لاسباب كثير، طريقة القتال مع الأعداء وتقطيعهم، الضربات اللي تقدر تضربها، والأسلحة اللي تستخدمها، ادمجها مع الموسيقى التصويرية اللي في الخلفية، وتطلع بخلطة آكشنية سحرية ما شفنا مثلها هذي السنة!
عشان كل هالأسباب، اخترنا لعبة Devil may Cry كأفضل لعبة آكشن هذي السنة!
وش رايك بلعبة Devil may Cry؟ ووش أفضل لعبة آكشن بالنسبة لك هذي السنة؟ شاركنا رأيك بالتعليقات!
