فازت لعبة بايونيتا 2 بجائزة “أكثر لعبة ممكن تلعبها” من جهة خيرية اسمها AbleGamers، وهي جهة مهتمّة باللاعبين ذوي الصعوبات.
معايير الجائزة تختلف عن المعايير اللي نعرفها، هذا بالاضافة الى انها معايير دقيقة جدًا. الجهة الخيرية تقول انها تعطي هالجائزة للعبة اللي تسوي التالي:
- تبذل مجهود واضح في تكوين تجربة سهلة للاعب، بحيث تعطيه أكثر من طريقة للعب اللعبة.
- قدرة قراءة كل شي مكتوب على الشاشة، حتى للناس اللي يعانون من عمى الألوان.
- تصميم اللعبة يكون تصميم متميّز بشكل عام.
هذي الأشياء كلها توفرت في بايونيتا 2، حسب الجهة الخيرية. اضافة الى هذا، اللعبة تقدر تلعبها باستخدام أكثر من وحدة تحكم، ويشمل هذا جهاز WiiU GamePad، يد التحكّم العادية والمعروفة Pro Controller ، وشاشة اللمس اللي في جهاز الجيم باد، بالاضافة الى انك تقدر تجمع أدوات التحكم وتلعب فيها كلها في أي وقت.
أما بالنسبة للألوان، فاللعبة ما تؤثر بشكل سلبي على المصابين بعمى العيون (حمانا الله واياكم) ويقدرون يلعبونها بشكل طبيعي.
كل الأسباب اللي ذكرناها على جنب، والسبب الحقيقي اللي خلّا اللعبة تحسم الأمر وتفوز بالجائزة هو انك تقدر تلعب كل المعارك في اللعبة باستخدام زر واحد فقط!.
يقولون المجموعة الخيرية:
” طريقة تطبيقهم لامكانية القتال باستخدام زر واحد المفروض يستخدمونه في باقي الألعاب ويتعلمون منها. هذي اللعبة تقدم دليل قاطع من ناحية انك تقدر تسوّي لعبة يلعبها كل الناس (أو أكبر عدد من الناس) بدون ما تؤثر على طريقة اللعب بشكل سلبي. عندك ألعاب معروفة مثل Shadow of Mordor المفروض انها تطبق هذا الشي، بحيث يقدر الشخص انه يلعبها باستخدام زر واحد، وفي نفس الوقت اللعبة فيها عمق في القتال بحيث يقدر اللاعب انه يتعمّق في أساليب القتال فيها”.
أخيرًا، المجموعة الخيرية قالت ان مطوّر اللعبة، Platinum Games، قدروا يسوون شي نادر جدًا.
وش رأيك في كلام المجموعة الخيرية؟
