بعد النجاح الكبير للجزء الأول لباتمان اركام أسيايلوم (Batman Arkham Asylum) و استمرار هالنجاح مع الجزء الثاني أركام سيتي (Batman Arkham City)، صدر مؤخرا الجزء الثالث من اللعبة أركام أوريجينز (Batman Arkham Origins) اللي أعلنوا عنه بشهر أبرل من هالسنة، لعبة مستواها بالمتعة والإثارة ما يقل عن الأجزاء السابقة .
بالنسبة لي كانت باتمان أركام أوريجينز من أكثر الألعاب اللي أنتظرها بهالسنة، كان حماسي يقابله تخّوف بسيط من دخول استوديو جديد يشتغل على اللعبة، فالأجزاء اللي راحت كان التطوير من استيديو Rocksteady، أما الجزء الجديد اشتغل عليه الأستوديو الكندي Warner Bros. Games Montréal، تغيير الأستوديو هو كان للأمانة سبب محاولتي إني أقلل من حماسي للعبة.
أحداث باتمان أركام أوريجينز بالنسبة للخط الزمني للقصة “Storyline” تعتبر قبل أحداث الجزء الأول باتمان أركام أسايلوم بخمس سنوات، كان فيها أول ظهور لشخصية The Joker، هالعنصر هذا كان بحد ذاته مُثير إننا نشوف كيف راح يقدمون لنا أول لقاء بينهم، هذي أحد النقاط اللي تميز فيها هالجزء، و هي “كقصة” تعتبر السنة الثانية لشخصية Batman بمحاولته لمحاربة الجريمة بمدينة جوثام (Gotham)
بهالجزء تغير فيه مؤدي صوت شخصية Batman و The Joker، كنا متعودين على Kevin Conroy كمؤدي صور لشخصية Batman لكن هالمرة جا بداله Roger Craig Smith، من المشهورين بمجال الفيديو جيمز، كان هو مؤدي صوت شخصية Ezio من لعبة أساسينز كريد (Assassin’s Creed) و برضو شخصية Chris Redfield من لعبة ريزدينت إيفيل (Resident Evil). أما مؤدي صوت شخصية The Joker هالمرة جا Troy Baker أحد أشهر مؤدي الأصوات بعالم الألعاب و الأنمي و الأفلام، كان مؤدي صوت شخصيات كثيرة بالألعاب كان آخرها Joel من لعبة ذا لاست أوف أس (The Last of Us) و برضو Booker من لعبة بايوشوك إنفننت (BioShock Infinite) و هو اللي راح يأدي صوت شخصية Revolver Ocelot من لعبة ميتال جير : فانتوم بين ( Metal Gear Solid V: The Phantom Pain) الجاية.
بداية اللعبة كانت ممتازة جدا و حماسية، ما يقل مستواها عن الأجزاء اللي قبل، نفس أسلوب التقديم سواء للشخصيات أو للقصة، و أسلوب القتال “Combat” ما زال يعتبر أكثر شي يميز هالسلسلة، أسلوب الهجوم و الدفاع “Attack & Counter” بالقتال كان عنصر حماسي بدرجة كبيرة، و إن كان للأسف ما فيه أي تطورات من هالناحية إلا إنه ما زال محافظ على مستواه، كانت مجرد إضافة بسيطة بأسلوب القتال كانت بوجود أداة يركبها Batman على يديه تعطيه القدرة إن تكون ضرباته بالكهرب بنفس حركات الهجوم و الدفاع. ما كانت فيه إضافات أكثر بالاعداء من ناحية تنوعهم، نفس أسلوب قتالهم تكرر بهالجزء إلا بإضافة عدو لازم تصد ضرباته مرتين ورا بعض، بس!
قتال و معارك الزعماء كانت مميزة بالجزئين باتمان أركام أسايلوم و باتمان أركام سيتي، بالجزء الجديد ما زال بنفس المتعة و المستوى، و إن كان ما فيه تغيير “كبير” بأسلوب القتال بين الزعماء بهالجزء لكن ما يزال مميز، يعني بالاجزاء السابقة كان فعلا فيه إختلافات كبيرة باسلوب القتال بين كل زعيم، يختلف فيه اسلوب اللعب و التكتيك كثير أحيانا، لكن بهالجزء نوعا ما الإختلاف بالأسلوب موب بالدرجة الكبيرة، لكن أرجع و أقول يظل قتال الزعماء مميز جدا و ما ينمل منه أبدا مهما كانت صعوبته.
أحد أبرز الأشياء اللي لفتتني بهالجزء هو المقاطع السنيمائية باللعبة و مقاطع الـ”CG”، جميلة جدا و متعوب عليها سواء بإخراجها أو جودة رسوماتها، لما تكون عندك مقاطع سنيمائية بهالجودة راح تعكس بكل تأكيد على القصة من ناحية ارتباطك فيها، هالشئ من أبرز النقاط اللي تميز هالجزء .
نعرف حنا إن الجزء السابق باتمان أركام سيتي كان العالم فيها مفتوح، مدينة كانت حيوية من ناحية الأشياء اللي ممكن تسويها، سواء من مهام جانبية أو بالإستكشاف أو التجميع، بالجزء الجديد باتمان أركام أوريجينز العالم يعتبر أكبر من الجزء السابق، لكن للأسف ما حسيته بحيوية الجزء السابق، المهام الجانبية شبيه بالجزء السابق من ناحية الفكرة. فيه إضافة بسيطة اللي هي “Most Wanted” و هي عبارة عن قائمة بأكثر المجرمين المطلوب القبض عليهم، مستوى المهام فيها ممتاز جدا و حماسي و شيق، أترك تفاصيله لكم حتى ما أخرب على أي أحد متعته.
نعرف إن شخصية Batman يمتلك حس “تحقيقي” و اكتشاف للجريمة أكثر من غيره، و بوجود خاصية الـ” Detective Mode” أو وضع التحقيق اللي كان موجود من باتمان أركام أسايلوم كان يعتبر عنصر مهم باللعبة و إضافة ممتازة، بهالجزء كان له حضور شيّق، صار فيه تحقيق بمسرح الجريمة لتفاصيل أكثر، و الاجمل منه أنه صار فيه إعادة للخط الزمني للجريمة و تقديمه حتى تقدر تحلل مسرح الجريمة أكثر، للأسف هالشي مو موجود كثير باللعبة لكن كان حضوره مميز جدا جدا .
النقطة السابقة تخلينا نتطرق الآن عن الأدوات “Gadgets” اللي كان دائما Batman يتميز فيها، حضورها بهالجزء كان بمستوى الاجزاء السابقة، أدوات كثيرة تعطيك أسلوب لعب مختلف أحيانا بالقتال أو بتجاوز الأمكان، لكن للأسف يقابله مستوى أقل بتطوير الادوات و القدرات “Upgrades”، لما تفتح قائمة التطويرات و تبدأ فيها راح تحس انه فعلا ممكن تطور من أدواتك و قدراتك، لكن لما تفتح أغلبها راح تحس إنها ميب قاعدة تضيف لك شي كبير بأسلوب اللعب، أحيانا تحس إن فيه “عشوائية” بترتيب و تنظيم القدرات، هالسلبية كانت موجودة بالجزء السابق، لكن أحس مستواها هنا أكثر سوء من اللي قبل.
أحد الإضافات الجديدة باللعبة هي الـ”Fast Travel” أو التنقل السريع، صار الآن عن طريق الـ”Batwing” اللي هي مركبة Batman الطائرة راح تتنقل بين نقاط محددة بالمدينة، بمجرد إنك تفتح الخريطة راح تقدر تحدد على الاماكن المحددة اللي تقدر تنتقل لها عن طريق الـ Batwing، راح يجيك شاشة تحميل “Loading” بسيطة و بعدها بتشوف نفسك بالمكان اللي إخترته.
مشكلة كانت موجودة معي من الأجزاء السابقة خصوصا مع Arkham city بحكم إنها كانت بعالم مفتوح هو الـ”Mini Map” أو الخريطة الصغيرة اللي تطلع لك تحت بأغلب الألعاب، خصوصا لما أكون داخل المباني، كان من المفترض إنها تكون موجودة لضرورتها، أضطر كل مرة ابغى شي بسيط من الخريطة أضغط على SELECT بعدين أفتح الخريطة و أشوف اللي ابيه و أرجع، كانت بتكون أسهل و أفضل و أريح لما يكون فيه Mini map أقدر اشوفها و أنا العب، يزداد الوضع سوء لما تكون عندي نقاط لتطوير القدرات، فلما اضغط SELECT ما يوديني مباشرة للخريطة، يوديني لقائمة تطوير القدرات لأن معي نقاط ما استخدمتها، و انا اصلا ابي أدخل للخريطة، فأضطر أنتقل لخيار الخريطة علشان أشوفها .
بشكل عام، لعبة باتمان أركام أوريجينز من أكثر الألعاب اللي استمتعت فيها هالسنة، تجربة بمستوى متعة و جمالية باتمان أركام سيتي، لكن للأسف كنت متوقع جُرأة أكثر من الأستوديو الجديد، ما شفنا له لمساته اللي نقدر نقول إنه أضاف شئ للسلسلة خصوصا إن الجزء السابق نزل بالربع الأخير من 2011 و على كلام الاستوديو إن التطوير للجزء الأخير كان من نهاية 2011، كان واضح تخوفه من ردة فعل الجمهور إذا بغير شي باللعبة، لكن يظل مستوى اللعبة من جميع النواحي عالي جدا .
بالنهاية، لعبة أقدر أنصح فيها كل واحد، خصوصا اللي ما لعبة أجزاء Batman اللي قبل، يقدر يدخل بهالجزء بدون ما يخاف إنه ممكن فاته شي بالقصة، لأن زي ما ذكرت قبل هالجزء تعتبر أحداثه قبل خمس سنوات من باتمان أركام أسايلوم اللي نزلت عام 2009، و إذا أعجبتك فأنصحك إنك ترجع للجزء باتمان أركام أسايلوم و بعدها باتمان أركام سيتي ، أما اللي لعبوا الأجزاء السابقة فبكل تأكيد أبقوله لازم تلعب هالجزء، لكن يبيلك تنزل من سقف توقعاتك، إذا أعجبتك باتمان أركام سيتي فالجزء الجديد بيعطيك نفس التجربة، لا تتوقع شئ أعلى . و هذا بحد ذاته شي رهيب لأن أصلا الجزء السابق كان “راااائع” .
