استعراض لرسماتكم الرائعة من مجتمعنا

رجعنا لكم من جديد بمجموعة رسمات رائعة من مجتمعنا. في الفترة الأخيرة وصلتنا رسمات متنوعة وممتازة.

في هذا الأسبوع، وآسفين اننا تأخرنا عليكم يوم واحد، بنعرض لكم المواهب اللي نشوفها في مجتمعنا بشكل شبه يومي.

هذي الرسمة خاطري فيها، لأنها نزلت في اللحظة اللي نشرت فيها موضوع الرسمات اللي قبل، ولا أضفتها في الموضوع بما اني نشرته خلاص. تقدرتشوف الابداع في الرسمة، سواءً من ناحية الفكرة المضحكة، او مستوى الاتقان الخرافي. شكرًا ثامر على الرسمة الخرافية.

الأخ زيكو شاركنا برسمة ممتازة جدًا، وباستخدام برنامج الرسام! الرسمة أخذت معه حوالي أسبوع ولكن بشكل غير متواصل طبعاً.

الموهوب فهد أحمد شاركنا برسمة فكرتها رائعة ومضحكة، بحيث راسم لنا قرصان معه شعار سعودي جيمر، الشعار المفضل له 🙂

رسمة متقنة مره للشخصية المعروفة سبايدرمان أو الرجل العنكبوت -احس اسمه يضحك بالعربي- من رسم الفنان ثامر355، واللي استخدم تاب سامسونج جالاكسي جالاكسي نوت، تطبيق Sketchbook Pro.

رسمة فكرتها مضحكة، مثل ما تشوفون ساكبوي من ليتل بيج بلانيت لابس مثل كريتوس ويقول له أنا كريتوس، بينما كريتوس زعلان (كعادته) وصار يطارده بسبب المزحة 🙂

دنيا، من الرسامات الرهيبات الموهوبات (متعوب على جمع مؤنث سالم :)) شاركتنا برسمة خرافية. الرسمة من لعبة APB.

ننهي رسمات هذا الأسبوع برسمة ممتازة من ريم سعود، وهي رسمة لشخصية Arno من الجزء الرابع لأساسنز كريد.

في هذا الأسبوع بالذات اضطريت أتخلى عن بعض الرسمات ولا أحطها هنا، عشان ما نكثر الرسمات. بامكانك تشوف كل الرسمات اللي رسموها لنا الرهيبين في القسم الخاص حق الرسمات.

مثل ما نقول لكم كل مرة، اذا أنت رسام فبامكانك تشاركنا رسماتك الرهيبه في مجتمعنا، ومتابعينا الرهيبين بيشوفونها، بالاضافة الى اننا بننشرها هنا في الموضوع الأسبوعي، وننشرها برضه في برنامج مشهور الأسبوعي على يوتيوب بعد ما ننتهي من بعض التعديلات اللي نسويها.

يعطيكم العافية جميعاً.