أحمد قربان
زهقت من كنوز لعبة اساسينز كريد يونيتي (Assassin’s Creed Unity) اللي تحتاج انك تفكها من موقعهم او برنامج الجوال تبعهم؟ اخيراً راح ينزلوا تحديث يسمح لك انك تفكها من داخل اللعبة بدون مايتطلب منك انك تروح لاي مصدر ثاني غير الجهاز اللي تلعب فيه اللعبة.
قال المطور يوبي سوفت (Ubisoft): “راح نفتح كل المحتويات اللي تحتاج برنامج الجوال او اللي تطلب منك ان تدخل موقعنا، حتى الكنوز الزرقة والذهبية راح نفتحها ايضا، اللاعبين يقدروا يدخلوا برنامج الجوال ويتصفحوا فيه بدون مشاكل لكن مافي اي محتوى في اللعبة راح يطلب منك استخدامه”
مثل مانعرف برنامج الجوال الخاص بيوبي سوفت العام الماضي مع لعبة اساسنز كريد بلاق فلاق (Black Flag) لكن في بلاك فلاق ماكان يطلب منك انك تستخدم البرنامج لكي تحصل على محتويات من داخل اللعبة، اما في يونيتي كل ماتمشي بباريس وانت مبسوط تلقى كنز وتفرح اكثر لكن تتنكد بسبب ان الكنز ماينفتح الا عن طريق برنامج الجوال. احيانا تكون هذي المحتويات ملابس او عملة داخل اللعبة تفيدك وتساعدك في شراء الاسلحة القوية. ومثل مانعرف ان في كنوز تحتاج انك تدخل للمتصفح الخاص بلعبة اساسنز كريد اللي اسمه اساسنز كريد انشيتز (Initiates). لكن مشكلة المتصفح انه تعطل بشكل مستمر في ايام الكريسمس و اجبر يوبي سوفت انهم يفتحوا قفل المحتويات اللي تحتاج للموقع لكل اللاعبين المتصلين بالنت.
التحديث نزل اليوم بالجهزة البلايستيشن 4 و الاكس بوكس ون وراح ينزل بكرة لمستخدمي البي سي.
من ناحية ثانية كتبنا خبر عن يوبي سوفت و قالوا ان لعبة اساسنز كريد يونيتي تطويرها كان جدا صعب بسبب المحرك الجديد. اشوف ان يوبي سوفت بتحاول تعوض المشاكل اللي صارت للعبة و تبغا اللاعبين يلعبوا اللعبة ثاني باي طريقة، شي جميل و يحسب لهم في وجهة نظري.
اش رايكم هل راح تلعبوا اللعبة عشان تجمعوا هذي المحتويات؟
احمد خالد
